Bicholim Market चतुर्थीनिमित्त डिचोलीत फुलांचा बाजार फुलला असून, फुलांना प्रचंड मागणी असल्याचे चित्र दिसून येत आहे. मागील दोन-तीन दिवसांपासून डिचोली बाजारात फुलांना प्रचंड मागणी असून, पुढील किमान दोन ते तीन दिवस तरी फुलांना मागणी कायम राहणार आहे.

मागणी असल्याने फुलांचा भावही वाढला आहे. मात्र, पुढील दोन दिवसांत फुलांचा तुटवडा निर्माण होण्याची शक्यता असून, फुले महागण्याची शक्यता आहे.

गणपती बाप्पांच्या घरोघरी आगमनाच्या पूर्वदिनी आणि काल (मंगळवारी) मिळून दोन दिवसांत बाजारात जवळपास पाच टनहून अधिक फुलांची विक्री झाल्याचा अंदाज आहे. आजही (बुधवारी) फुले खरेदीला प्रचंड जोर आला होता.

गणपती बाप्पाच्या नावाने फुलांना मागणी असल्याने फूल बाजारातील वातावरणही खुलून उठले असून, फुले विक्रेत्यांना ''अच्छे दिन'' आले आहेत. डिचोलीत कर्नाटक राज्यातून झेंडू, डिस्को, सफेद मिळून विविध प्रकारची शेवंती, लहान गुलाब, अस्टर यांंची आवक होते.

झेंडूची फुलेही महागली

गेल्या चार दिवसांपासून बाजारात फुलांची प्रचंड आवक होत आहे. स्थानिक जाईची फुलेही बाजारात उपलब्ध होत असली, तरी त्यांचे प्रमाण कमी आहे. फुलांना मागणी वाढल्याने फुलांचे दरही वाढले आहेत.

सध्या झेंडू फ़ुलांचे दर 160 रुपये किलो असे आहेत. तर सफेद शेवंती, लांब देठाची आणि डिस्को शेवंती, अस्टर आणि लहान गुलाब 300 ते 320 रुपये किलो याप्रमाणे विकण्यात येत आहेत. फुलांच्या हारांनाही प्रचंड मागणी आहे. आकाराप्रमाणे 100 रुपयांपासून 400 रुपयांपर्यंत पुष्पहार विकण्यात येत आहेत.

आंबाडे गायब

चतुर्थीत आंबाड्यांना मोठी मागणी असते. यंदा मात्र आंबाड्यांचा मोठा तुटवडा निर्माण झाला आहे. आज (बुधवारी) तर बाजारात ''आंबाडे'' क्वचितच दिसून येत होते.

5 रूपये एक नग याप्रमाणे आंबाड्यांना भाव आला आहे. पावसामुळे आंबाडे काढण्यात अडचण निर्माण झाल्याने यंदा चतुर्थीत आंबाड्यांचा तुटवडा निर्माण झाल्याचे एका विक्रेत्याने सांगितले.