डिचोली: डिचोली तालुक्यातील लाखेरे येथे एक भीषण अपघात घडला. नेस्ले कंपनीच्या कामगारांना घेऊन जाणाऱ्या बसने रस्त्याशेजारील एका आंब्याच्या झाडाला जोरदार धडक दिली. या भीषण अपघातात बसचालकासह एकूण सात कामगार जखमी झाले असून एकाची प्रकृती अत्यंत चिंताजनक असल्याचे सांगण्यात येत आहे.

नेस्ले कंपनीची ही बस कामगारांना घेऊन जात असताना लाखेरे-डिचोली परिसरात आली असता चालकाचे बसवरील नियंत्रण सुटल्याने हा अपघात झाल्याचे सांगितले जात आहे. बस वेगात असल्याने ती थेट रस्त्याच्या कडेला असलेल्या एका मोठ्या आंब्याच्या झाडावर जाऊन आदळली. ही धडक इतकी भीषण होती की, बसच्या पुढच्या भागाचा अक्षरशः चक्काचूर झाला. अपघाताचा (Accident) आवाज ऐकून स्थानिक नागरिक तातडीने मदतीसाठी धावून आले.

बचावकार्य आणि उपचार स्थानिकांनी बसमध्ये अडकलेल्या जखमींना बाहेर काढले आणि तातडीने डिचोली येथील प्राथमिक आरोग्य केंद्रात दाखल केले. जखमींमध्ये बसचालक आणि सहा कामगारांचा समावेश आहे. प्राथमिक माहितीनुसार, एका कामगाराच्या डोक्याला गंभीर दुखापत झाल्यामुळे त्याची प्रकृती चिंताजनक आहे. डॉक्टरांनी दिलेल्या माहितीनुसार, जखमींवर तातडीने उपचार सुरु करण्यात आले असून गरजेनुसार काहींना बांबोळी येथील गोवा वैद्यकीय महाविद्यालयात (GMC) हलवले जाण्याची शक्यता आहे.

दुसरीकडे, हा अपघात बसच्या तांत्रिक बिघाडामुळे झाला की चालकाला डुलकी लागल्यामुळे याचा तपास डिचोली (Bicholim) पोलीस करत आहेत. प्रत्यक्षदर्शींच्या मते, बसचा वेग जास्त होता आणि वळणावर नियंत्रण सुटल्याने हा अपघात घडला. या घटनेमुळे नेस्ले कंपनीच्या कामगारांमध्ये आणि स्थानिकांमध्ये भीतीचे वातावरण पसरले आहे. पोलिसांनी घटनास्थळाचा पंचनामा केला असून पुढील तपास सुरु आहे.