पणजी: गोव्यासाठी एक अत्यंत अभिमानास्पद आणि महत्त्वाची बातमी समोर आली आहे. युरोपीय हवाई वाहतूक पुरवठादार कंपनी आणि गोव्याच्या कंपनीमध्ये व्यावसायिक विमानांसाठी पहिल्यांदाच मोठं डील झाली आहे. ऑस्ट्रियन एरोस्पेस फर्म एफएसीसी एजी या कंपनीने गोव्यातील कायनेको एरोस्पेस अँड डिफेन्स या कंपनीसोबत प्रवासी विमानांसाठी रचनात्मक भाग तयार करण्याचा सात वर्षांचा करार केला आहे. २०२५ च्या पॅरिस एअर शोमध्ये या बहु-दशलक्ष डॉलरच्या कराराची घोषणा करण्यात आली.

१० महिन्यांचा समन्वय आणि जागतिक नेटवर्कमध्ये प्रवेश

या करारामुळे एफएसीसी आणि कायनेकोमध्ये पुढील १० महिन्यांसाठी तांत्रिक आणि कार्यात्मक समन्वयाची प्रक्रिया सुरू होईल. जर हा करार यशस्वीरित्या राबवला गेला, तर कायनेकोला एफएसीसीच्या जागतिक पुरवठादार नेटवर्कमध्ये  सामील होण्याची संधी मिळेल. एफएसीसीने २०२४ मध्ये ८८४.५ दशलक्ष युरोचा वार्षिक महसूल नोंदवला आहे आणि एअरबस, बोईंग, बॉम्बार्डियर आणि एम्ब्रेर यांसारख्या जगातील आघाडीच्या कंपन्या त्यांचे ग्राहक आहेत.

भारताच्या वाढत्या महत्त्वाचे प्रतीक

कायनेको ग्रुपचे संस्थापक आणि अध्यक्ष शेखर सरदेसाई यांनी याबद्दल बोलताना सांगितले, "कायनेको ग्रुपने अत्याधुनिक क्षमता, जागतिक स्तरावरील क्षमता आणि जागतिक दर्जाचे उत्पादन व व्यवस्थापन पद्धतींमध्ये धोरणात्मक आणि दूरगामी गुंतवणूक केली आहे." ते पुढे म्हणाले, "आम्ही टीयर-१ कंपन्या आणि जागतिक व्यावसायिक विमान मूळ उपकरण उत्पादकांच्या बदलत्या गरजांनुसार स्वतःला जुळवून घेत आहोत.

भारतातील एअर इंडिया आणि इंडिगो या विमान कंपन्यांनी एअरबस आणि बोईंगला एकूण १,८३० विमानांची ऑर्डर दिली आहे. पिळर्ण येथे तयार होणारे हे भाग या भारतीय विमान कंपन्यांना दिल्या जाणाऱ्या काही विमानांमध्ये वापरले जाण्याची शक्यता आहे.

जागतिक व्यावसायिक विमान उद्योगात भारताचे योगदान सध्या केवळ २% असले तरी, देश एरोस्पेस उत्पादनात आपला वाटा वाढवण्यासाठी सक्रियपणे प्रयत्न करत आहे.

चीनवरील अवलंबित्व कमी करण्याचा प्रयत्न

जगातील आघाडीच्या लाईटवेट एरोस्पेस सिस्टिम्स आणि घटकांचे पुरवठादार असलेल्या एफएसीसी कंपनीला पूर्वी हे भाग चीनआणि पॅरिसमधून मिळत होते. कंपनीने संकेत दिले की, कायनेकोसोबतच्या त्यांच्या सहकार्यामागे गुणवत्ता, खर्च, वितरण आणि नवनवीन संशोधनात कठोर मानके पूर्ण करणाऱ्या "जागतिक स्तरावर स्पर्धात्मक भागीदारांकडे" जाण्याची त्यांची जाणीवपूर्वक भूमिका आहे. कोविड-१९ महामारीनंतर पुरवठा साखळीतील असुरक्षितता आणि चीनवरील अति-अवलंबित्व यामुळे उद्योगात चिंता वाढली होती, याच पार्श्वभूमीवर हा करार महत्त्वाचा मानला जात आहे.

कायनेको लिमिटेडचा एक भाग असलेली कायनेको एरोस्पेस अँड डिफेन्स ही गोव्याच्या लहान पण सातत्याने वाढत असलेल्या एरोस्पेस आणि कंपोझिट उत्पादन परिसंस्थेचा एक भाग आहे. या कंपनीने यापूर्वी बीएई सिस्टिम्स आणि हिंदुस्तान एरोनॉटिक्स लिमिटेडयांच्याकडील लष्करी करारांसह, भारतीय अंतराळ संशोधन संस्थेच्या उपग्रह कार्यक्रमासारख्या देशांतर्गत संरक्षण आणि अंतराळ कार्यक्रमांवर काम केले आहे.