पणजी : राज्यात रॉटविलर आणि पीटबुल या हिंस्र स्वभावासाठी ओळखल्या जाणाऱ्या कुत्र्यांच्या जाती पाळण्यावर राज्य सरकार बंदी घालणार आहे. यासंदर्भातील विधेयक राज्य विधानसभेच्या आगामी अधिवेशनात मांडण्यात येणार असून, त्याला राज्य मंत्रिमंडळाने झालेल्या बैठकीत मान्यता दिली. मुख्यमंत्री डॉ. प्रमोद सावंत यांनी मंत्रिमंडळ बैठकीनंतर आयोजित पत्रकार परिषदेत ही माहिती दिली.

मंत्रालयात पत्रकारांशी बोलताना पशुवैद्यकीय पशुसंवर्धन खात्याचे मंत्री नीळकंठ हळर्णकर म्हणाले, ‘रॉटविलर आणि पीटबुल या जाती अनेकदा हल्लेखोर आणि नियंत्रणाबाहेर जातात. त्यांच्याकडून लहान मुलांपासून वृद्धांपर्यंत कोणालाही गंभीर इजा होण्याचा धोका असतो.

त्यामुळे हे श्वान घरात पाळण्यावर बंदी आणण्याचा निर्णय घेण्यात आला आहे. विधेयकाच्या अंमलबजावणीनंतर संबंधित जातींचे पाळीव प्राणी घरात ठेवणाऱ्यांवर कायदेशीर कारवाई होणार आहे.’ मंत्रिमंडळाने गोवा प्राणी प्रजनन आणि पाळीव प्राणी (नियमन व नुकसान भरपाई) विधेयक, २०२५ यास मंजुरी दिली आहे.