Banastarim Bridge Accident बाणस्तारी येथील भीषण अपघातातील मृत सुरेश आणि त्यांची पत्नी भावना फडते यांच्यावर काळाने घाला घातला. परंतु नियतीने असा काही वेगळा खेळ खेळली की, सुरेशचा मृत्यू त्याच्या माजी सहकाऱ्याच्या निष्काळजीपणा झाला.

सुरेश फडते आणि परेश सावर्डेकर हे दोघेही एकेकाळी खोर्ली औद्योगिक वसाहतीत असलेल्या फन स्कूल कंपनीमध्ये सहकारी होते, अशी माहिती समोर आली आहे.

सुरेश फडते इलेक्ट्रिशन म्हणून कार्यरत होते तर परेश हा खरेदी आणि विक्री विभागामध्ये होता. या गोष्टीला बराच काळ उलटला आहे. परेश आणि त्याची पत्नी मेघना दोहेही रोटरी क्लबचे सदस्य असून विशेष मुलांसाठी विविध उपक्रम राबवत होते.

त्यात अनेकदा ते मुलांना घेऊन फन स्कूलमध्ये येत होते. अपघाताच्या पूर्वी देखील आपल्या मुलांना खेळ घेण्यासाठी परेश फन स्कूल येथे आला होता. तेव्हा त्याची सुरेश बरोबर भेट झाली होती.

परंतु काही दिवसानंतरच परेशच्या निष्काळजीपणामुळे सुरेश, त्याची पत्नी भावना, अनुप करमाकर यांचा मृत्यू झाला तर शंकर हळर्णकर, वनिता भंडारी आणि राज माजगावकर गंभीर जखमी झाले आहेत.

दै. गोमन्तकने फन स्कूल व्यवस्थापनाशी संपर्क साधला असता सुरेश फडते हे उत्तम कर्मचारी होते. या वर्षी ३१ जुलै रोजी ते सेवा निवृत्त झाले होते, परंतु त्यांची काम करण्याची शैली एवढी उत्तम होती की, व्यवस्थापनाने त्यांना एक वर्षाची मुदत वाढ देण्याचा निर्णय घेतला होता.

हळर्णकर यांच्यावर दुसरी शस्त्रक्रिया

बाणस्तारी अपघातातील गंभीर जखमी झालेले शंकर हळर्णकर यांच्यावर दुसरी शस्त्रक्रिया करण्यात आली आहे. हळर्णकर यांच्या मणक्याला गंभीररीत्या दुखापत झाल्याने त्यांचे दोन्ही हात आणि एक पायाची हालचाल होत नव्हती.

शस्त्रक्रियेनंतर त्यांना अतिदक्षता विभागातून बाहेर काढण्यात आले आहे. त्यांच्यावर पहिली शस्त्रक्रिया १० ऑगस्ट रोजी केली होती. तर वनिता भंडारी धोक्यातून बाहेर असून स्थिर आहे. तिच्यावर देखील अनेक शस्त्रक्रिया झाल्या.