म्हापसा: बार्देश उपजिल्हाधिकाऱ्यांनी मंगळवारी कठोर पाऊल उचलत, बागा-कळंगुट येथील पर्यटन खात्याच्या जागेतील सतरा बेकायदेशीर बांधकामे जमीनदोस्त केली. या कारवाईमुळे परिसरात मोठी खळबळ उडाली आहे. यातील अनेक वास्तूंचे मालक किंवा भाडेकरू गेल्या अनेक दशकांपासून पर्यटन खाते आणि इतर प्राधिकरणांशी न्यायालयीन लढा देत होते.

मात्र, मंगळवारी अचानक झालेल्या या कारवाईमुळे सर्वांनाच धक्का बसला. अधिकृत सूत्रांनी दिलेल्या माहितीनुसार, उच्च न्यायालयाच्या आदेशानुसार ही कारवाई केली जात आहे. बागा येथील एकूण १७ अनधिकृत बांधकामे पाडण्याचे निर्देश दिले असून, त्यापैकी काही बांधकामे सीआरझेड नियमांचे उल्लंघन केल्याप्रकरणी जमीनदोस्त करण्यात येत आहेत. या मोहिमेवेळी पर्यटन विभागाचे अधिकारी आणि कळंगुट पोलिसांचा मोठा ताफा तैनात होता. विशेष म्हणजे, या संपूर्ण प्रक्रियेदरम्यान कळंगुट पंचायतीचा एकही प्रतिनिधी उपस्थित नव्हता. सरपंच जोसेफ सिक्वेरा यांनी सांगितले की, या पाडकामाबाबत पंचायतीला कोणतीही पूर्वसूचना दिली नव्हती.

परप्रांतियांवरही कारवाई हवी

स्थानिक व्यावसायिकांनी या कारवाईवर नाराजी व्यक्त केली आहे. केवळ स्थानिकांना लक्ष्य केले जात असून, सरकारी जमिनीवर अतिक्रमण करणाऱ्या परप्रांतीयांवर मात्र कोणतीही कारवाई होत नाही, असा आरोप काही भागधारकांनी यावेळी केला.

...तर हे अतिक्रमण झालेच नसते!

सुमारे १० वर्षांपूर्वी पर्यटन खात्याने ५० हजार चौरस मीटर जागेवरील अतिक्रमणे हटवून जीटीसीडी पार्किंग आणि फूड कोर्टसाठी जागा मोकळी केली होती. मात्र, बागा किनाऱ्याच्या अगदी जवळ असलेली काही प्रसिद्ध रेस्टॉरंट्स (Restaurants) आणि दुकाने तशीच राहिली होती. मात्र, मंगळवारी या बांधकामांना लक्ष्य केले.