पणजी : केंद्राने घालून दिलेल्या नियमानुसारच राज्य सरकारने विविध विकास कामांसाठी कर्ज घेतल्याची माहिती मुख्यमंत्री प्रमोद सावंत यांनी आज विधानसभेत दिली. तर दुसरीकडे, सरकारने सादर केलेला अर्थसंकल्प हा पूर्णतः फसवा आणि राज्याला दिवाळखोरीकडे नेणारा आहे, असा आरोप विरोधकांनी केला आहे. या अर्थसंकल्पीय अधिवेशनाचे आज सूप वाजले.

40 विधेयके आणि 55 तारांकीत प्रश्नांवर सविस्तर चर्चा या अधिवेशनात झाली असली तरी सरकारने पुरेसा वेळ दिला नसल्याची टिका विरोधकांनी सत्ताधाऱ्यांवर केली आहे. या अधिवेशनाबाबत सभापती रमेश तवडकर म्हणाले, पंचायत निवडणुकांमुळे अधिवेशनाचा कार्यकाळ कमी करावा लागला असला तरी सभागृहासमोरील सर्व कामकाज संपवले आहे.

सभागृहात सत्ताधारी आणि विरोधकांना चर्चेसाठी मुबलक वेळ दिला आहे. त्यामुळेच 40 विधेयके आणि 55 तारांकीत प्रश्नांबरोबर सर्वच अनुदान मागण्यांवर सविस्तर चर्चा करण्यात आली आहे. याशिवाय शून्य प्रहर आणि लक्ष्यवेधीच्या माध्यमातून सभागृह सदस्यांनी अनेक प्रश्न तडीस नेले आहेत. दरम्यान, या अधिवेशनावर मुख्यमंत्री प्रमोद सावंत यांनी समाधान व्यक्त केले आहे. तर विरोधकांनी मात्र महत्त्वपूर्ण विधेयकांवर चर्चा झाली नसल्याचे सांगत टीका केली.