Minister Mauvin Godinho in Goa Assembly 2023: राज्य सरकारने 10 मे 2023 रोजी 'नोंदणीकृत वाहन स्क्रॅपेज धोरण' अधिसूचित केले आहे. त्यानुसार 15 वर्षांपेक्षा जुनी असलेली वाहने सरकार भंगारात काढणार आहे, अशी माहिती परिवहन मंत्री माविन गुदिन्हो यांनी शुक्रवारी विधानसभा सभागृहात दिली.

विरोधी पक्षाच्या आमदारांनी विचारलेल्या प्रश्नाला गुदिन्हो उत्तर देत होते. दरम्यान, राज्यात 15 वर्षांपेक्षा जुन्या सरकारी वाहनांची संख्या 520 इतकी आहे. तर ही वाहने बदलण्यासाठी अंदाजे 95.85 कोटी खर्च येणार असल्याचेही त्यांनी सांगितले.

गुदिन्हो म्हणाले की, या धोरणाची अंमलबजावणी करण्यासाठी 'नोंदणीकृत वाहन स्क्रॅपिंग सुविधा' (RVSF) स्थापन करण्यात येत आहे.

रस्त्यावरील जुनी आणि प्रदूषण करणारी वाहने कमी करण्यासाठी आणि हवेची गुणवत्ता सुधारण्यासाठी रस्ते वाहतूक आणि महामार्ग मंत्रालयाने (MoRTH) स्क्रॅपिंग धोरण लागू केले आहे. प्रदुषण नियंत्रणासाठी जुन्या वाहनांची संख्या कमी करणे हाच या धोरणाचा उद्देश आहे.

वातावरणातील कार्बन वाढीसाठी वाहतूक क्षेत्र मोठ्या प्रमाणात जबाबदार आहे. हवामान बदलाच्या दृष्टीने हे धोरण लाभदायी ठरणार आहे.