म्हापसा: गोवा विधानसभेच्या अर्थसंकल्पीय अधिवेशनादरम्यान प्रेक्षक गॅलरीत फलक झळकावून आंदोलन करणाऱ्या ५ जणांच्या अडचणीत वाढ झाली आहे. मिराबाग येथील प्रस्तावित बंधाऱ्याला विरोध करणाऱ्या या आंदोलकांविरुद्ध पर्वरी पोलिसांनी म्हापसा येथील प्रथम श्रेणी न्यायालयात ३०० पानांचे आरोपपत्र दाखल केले आहे. यात माजी मंत्री दीपक पाऊसकर यांचाही समावेश आहे.

नुकत्याच पार पडलेल्या अर्थसंकल्पीय अधिवेशनादरम्यान ६ मार्च २०२६ रोजी, सकाळी ११.३० च्या सुमारास ही घटना घडली होती. सभागृहाचे कामकाज सुरू असताना मिराबाग येथील बंधाऱ्याला विरोध करण्यासाठी काही आंदोलक प्रेक्षक गॅलरीत उपस्थित होते. त्यांनी अचानक सरकारविरोधी घोषणाबाजी करत ‘आमका नाका बांध’ अशा आशयाचे फलक झळकावले होते. या प्रकारामुळे सभागृहाच्या कामकाजात व्यत्यय आला होता.

माजी मंत्री दीपक पाऊसकर यांच्यासह हेमंत भंडारी, उमेश नाईक, उपेंद्र नाईक आणि आपा नाईक या पाच जणांविरुद्ध हे आरोपपत्र दाखल करण्यात आले आहे. या प्रकरणात पोलिसांनी एकूण २१ साक्षीदारांच्या साक्षी नोंदवल्या आहेत. विधानसभा सचिवालयाने या प्रकरणी पोलिसांत अधिकृत तक्रार दिली होती, ज्यावरून ही कारवाई करण्यात आली आहे. सध्या हे ३०० पानांचे आरोपपत्र न्यायालयात सादर केले असून, आता या ५ आंदोलकांविरुद्ध कायदेशीर कारवाईची प्रक्रिया सुरू झाली आहे.