Goa Assembly पावसाळी अधिवेशनासाठी आज, मंगळवारी कामकाज सल्लागार समितीची बैठक झाली. या बैठकीत सत्ताधाऱ्यांप्रमाणेच विरोधकांनाही चर्चेसाठी समान वेळेची केलेली मागणी मान्य करण्यात आल्याने या अधिवेशनात विरोधकांना चर्चेत जास्त काळ भाग घेता येणार आहे.

18 जुलै ते 10 ऑगस्टपर्यंत 18 दिवस हे अधिवेशन चालणार आहे. या अधिवेशनासाठी मंगळवारी कामकाज सल्लागार समितीची बैठक झाली.

या बैठकीला सभापती रमेश तवडकर, उपसभापती जोशुआ डिसोझा, मुख्यमंत्री डॉ. प्रमोद सावंत, विरोधी पक्षनेते युरी आलेमाव, मंत्री सुदिन ढवळीकर, आमदार विजय सरदेसाई, वेंझी व्हिएगस, वीरेश बोरकर आणि विधानसभा सचिव नम्रता उल्मन उपस्थित होत्या.

आजच्या बैठकीत विरोधकांनी आश्वासन समिती सक्रिय करणे, विरोधकांना चर्चेसाठी वाढीव वेळ द्यावी आणि चार लक्षवेधी सूचना मांडता याव्यात, अशी मागण्या केली होती. या मागण्या सत्ताधारी गटाने मान्य केल्याने आज विरोधक खूश होते. या अधिवेशनात खासगी कामकाजाचे तीन दिवस आहेत.

नेमकेच प्रश्‍न विचारा!

विधानसभेत अनेक नवीन आमदार पाचपेक्षा जास्त प्रश्न विचारतात. त्यामुळे विधानसभेचा वेळ वाया जातो. यासाठी आमदारांनी नेमकेच प्रश्न विचारावेत, असे सांगण्यात आले आहे.

विधानसभा दीर्घकाळ चालणारी असल्याने संध्याकाळी 7 पर्यंत कामकाज संपेल, हे पाहिले जाईल. यात 3 तास विविध मुद्द्यांवर चर्चा होईल, याकडे लक्ष दिले जाईल, अशी ग्वाही सभापती तवडकर यांनी दिली.

कामकाज सल्लागार समितीच्या मंगळवारच्या बैठकीत विरोधकांच्या मागण्या मान्य केल्या आहेत. त्यामुळे या दीर्घकाळ चालणाऱ्या अधिवेशनात विरोधकांनी केवळ विरोधाला विरोध न करता राज्याच्या हितासाठी सकारात्मकपणे विरोधकाची भूमिका बजावावी. - रमेश तवडकर, सभापती.