गोव्यातील समुद्रकिनाऱ्यांचे सौंदर्य पाहण्यासाठी देश विदेशातील पर्यटक येत असतात. याबरोबरच समुद्रात पोहण्याचा मोह काही पर्यटकांना आवरत नाही. मात्र, हा मोह काही पर्यटकांच्या अंगलट आला आहे.

गोव्यात सहा वर्षांत तब्बल 118 पर्यटकांचा बुडून मृत्यू झाला आहे. यातील सर्वात जास्त मृत्यू समुद्रात बुडून मृत्यू झाले आहेत.

आमदार अॅलेक्स लॉरेन्स यांनी विधानसभेत याबाबत प्रश्न विचारला होता. पर्यटनमंत्री रोहन खंवटे यांनी या प्रश्नाला उत्तर दिले आहे. गोव्यात सहा वर्षात 118 पर्यटकांचा बुडून मृत्यू झाला असून, त्यापैकी 78 जणांचा समुद्रात बुडून मृत्यू झाला आहे.

अतिउत्साही पर्यटक जीव धोक्यात घालून समुद्रात पोहण्याचा आनंद घेतात मात्र, सुरक्षेच्या नियमांकडे लक्ष न दिल्यामुळे पर्यटकांना जीव गमवावा लागतो. समुद्र किनाऱ्यावर लावलेल्या धोक्याच्या इशाऱ्यांकडे पर्यटक दुर्लक्ष करतात आणि खोल समुद्रात उतरतात त्यामुळे जीव गमावतात. असे पर्यटनमंत्री खंवटे यांनी म्हटले आहे.

अपघाती मृत्यू अर्थसहाय्य योजनेंतर्गत 118 जणांच्या कुटुंबीयांना मदत

रस्ते अपघाती मृत्यू अर्थसहाय्य योजनेंतर्गत 118 जणांच्या कुटुंबीयांना मदत करण्यात आली आहे. 2020 सालापासून 118 जणांना प्रत्येकी दोन लाख रूपये मिळून 2.34 कोटी रूपये अर्थसहाय्य करण्यात आले आहे.

यात निष्काळजी आणि बेफिकरीने वाहन चालवणे, स्वंय अपघात, झाड पडल्यामुळे, गुरांना धडक, इतर वाहनांना धडक अशा विविध अपघाताच्या घटनांचा समावेश आहे.