पणजी: आमोणा–केपे येथील नियोजित कृषिघराचे काम येत्‍या ऑक्‍टोबरपासून सुरू करण्‍यात येईल, अशी हमी मुख्यमंत्री डॉ. प्रमोद सावंत यांनी शुक्रवारी विधानसभा सभागृहात बोलताना दिली.
आमदार एल्‍टन डिकॉस्‍टा यांनी प्रश्‍नोत्तराच्‍या तासाला याबाबतचा प्रश्‍न विचारला होता. आमोणा–केपे येथील कृषिघराची प्रक्रिया २०२२ पासून सुरू करण्‍यात आली होती. त्‍यासाठी निविदाही जारी करण्‍यात आल्‍या होत्‍या. परंतु, अद्याप कृषिघराचे बांधकाम सुरू झालेले नाही. या भागात कृषीघर कार्यान्‍वित झाल्‍यानंतर त्‍याचा मोठा फायदा स्‍थानिक शेतकऱ्यांना मिळणार आहे.
त्‍यामुळे सरकारने लवकरात लवकर कृषिघराची उभारणी करावी, अशी मागणी त्‍यांनी केली. त्‍यावर कृषीमंत्री रवी नाईक यांनी आमोणा–केपे येथील कृषीघरासाठी नव्‍याने निविदा जारी केल्‍या जातील, असे स्‍पष्‍ट केले. तर, मुख्यमंत्री डॉ. प्रमोद सावंत यांनी येत्‍या ऑक्‍टोबरपासून कृषिघराचे काम सुरू केले जाईल, अशी ग्‍वाही दिली.
आमोणा–केपे येथील कृषीघराबाबत चर्चा सुरू असताना विरोधी पक्षनेते युरी आलेमाव यांनी या कृषी घरात कोणकोणत्‍या सुविधा असतील, असा प्रश्‍न केला. त्‍यावर मंत्री नाईक यांनी काही सुविधांची माहिती दिली. पण, त्‍यावर समाधान न झाल्‍याने युरींनी त्‍यांच्‍यावर प्रश्नांचा भडिमार सुरू केला. त्‍यावर ‘तुम्‍ही शेतात कधी गेलात का? तुम्‍ही सभापतींचे उदाहरण घ्या’, असे म्‍हणत रवींनी त्‍यांना गप्‍प केले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.