मडगाव : विधानसभा निवडणुकीचे मतदान झाल्यास सात दिवस उलटले आहेत, तर मतमोजणीसाठी 20 दिवस उरले आहेत. तरीही लोकांचा निवडणूक ज्वर अजून कमी झालेला दिसत नाही. या दिवसांत सर्वत्र दिसून येते ती चौकाचौकांत निवडणुकीच्या (Election) निकालांची केली जाणारी भाकिते व त्यात रंगलेली लहानथोर मंडळी.

कुणीही परिचयाचा भेटला, की पहिला प्रश्र्न केला जातो तो निवडणुकीच्या निकालाचा. तुमच्याकडे कोण निवडून येणार, अमका की, तमका? बाजारात, हॉटेलात, बसमध्ये वा अन्यत्र कुठेही हीच चर्चा सुरू असल्याचे दिसून येते.

तशातच राजकीय (Politics) पक्षांचे नेते, कार्यकर्ते वा समर्थक भेटले तर मग त्या चर्चेला मर्यादाच राहात नाही. मग ती चर्चा एका मतदासंघापुरती मर्यादित राहात नाही, तर राज्य स्तरावर पोचते. एक खरे की, मतदान आटोपल्यापासून बहुतेक उमेदवारांची कार्यालये जरी बंद झालेली असली तरी बहुतेकांनी एकंदर मतदानाचा आढावा मात्र जरूर घेतला आहे.

राज्याबाहेरील पक्षही चर्चेत

कोण निवडून येणार, कोण पराभूत होणार, एवढेच नाही तर कोणाचे सरकार (Government) सत्तेवर येणार, कोण मंत्री होणार, सरकारला कोणते अपक्ष वा पक्ष पाठिंबा देणार, असे अनेक तर्क-वितर्कही या चर्चेत येतात. या चर्चा ऐकणारा कित्येकदा चक्रावून जातो. ही चर्चा अखेर गोव्यात (goa) नव्याने आलेल्या तृणमूल कॉंग्रेस (TMC) पक्षावरही बऱ्याचदा घसरते, त्याचप्रमाणे आम आदमी पक्ष, रिव्होल्युशनरी गोवन्समुळे कोणाला फटका बसणार, यावरही बराच खल होताना दिसतो.