वन खात्यात 10 ते 15 वर्षांपासून रोजंदारीवर काम करणाऱ्या कर्मचाऱ्यांना सेवेत कायम करावे. त्याचप्रमाणे वन्यप्राणी मानवी वस्तीपर्यंत येऊ नयेत, यासाठी सौरऊर्जेवरील फेन्सिंगची उभारणी करावी, त्यासाठी वनमंत्री व मुख्यमंत्र्यांनी वन खात्यासाठी विशेष आर्थिक तरतूद करावी, अशी मागणी आमदार डॉ. दिव्या राणे यांनी विधानसभेत केली.

दरम्यान, राज्यभरात मागील काळात वनाला आगी लागण्याच्या घटना घडल्या होत्या, तेव्हा या कर्मचाऱ्यांनी रात्रंदिवस काम केले. विविध राज्यांतून आलेले हे कर्मचारी विविध ठिकाणी काम करीत आहेत. हा वर्ग एवढे काम करीत असतो, तरीही अनेक वर्षांपासून त्यांचे वेतन एकच आहे. त्यांची नोकरी तात्पुरती सुरक्षित करावी, त्यानंतर शक्य असल्यास त्यांना कायम करावे, अशी मागणी आमदार डॉ. दिव्या राणे यांनी केली.

रिसर्च ऑफ डेव्हल्पमेंट सायन्टिफिक मॅनेजमेंट दी फॉरेस्ट वाईल्ड लाईफ या संस्थेने आता वन खाते, क्लायमेंट चेंज, इको सिस्टिम, इकॉलॉजिकल मॅनेजमेंट, फॉरेस्ट रिसर्च, जेनेरेटिक रिसोर्स मॅनेजमेंट यांचाही अभ्यास करावा. या विभागाने राज्यातील वनांच्या संरक्षणाच्या दृष्टीने संशोधन करावे, अशी मागणीही आमदार डॉ. दिव्या राणे यांनी केली.

प्राण्यांबाबत संशोधन करावे

गवे, रानडुकर हे लोकांच्या घरात, शेतात घुसतात त्याची कारणे शोधली पाहिजेत. त्यांची अन्नसाखळी तुटली आहे का, त्यांच्यासाठी कोणत्या पद्धतीचे अन्न पुरवता येईल यादृष्टीने संशोधन करावे. सत्तरी (Sattari) भागातील कृषी क्षेत्रात गवे व रानडुक्कर मोठ्या प्रमाणात येत असल्याने शेतीचे नुकसान होत आहे. त्याशिवाय माकड, वानरही मोठ्या प्रमाणात सुपारी, नारळ व इतर फळबागा नष्ट करीत आहेत, असे आमदार डॉ. दिव्या राणे यांनी सांगितले.