आसगाव घरफोडी प्रकरणात आगरवाडेकर कुटुंबीयांकडून या घटनेच्या सातव्या दिवशी घुमजाव करण्यात आले असून संशयित पूजा शर्मा हिचा घर मोडतोड प्रकरणात हात नसल्याचा निर्वाळा दिला आहे.

यासंदर्भात सरकारी तपास यंत्रणांनी या घटनेशी थेट संबंध नसलेल्या पूजा शर्मा यांना विनाकारण अटक न करता सखोल चौकशी करूनच प्रकरणाच्या मुळाशी जाणे योग्य ठरेल, असे आगरवाडेकर यांच्या वतीने त्यांचे वकील प्रसाद देसाई यांनी शुक्रवारी आसगाव येथे प्रसार माध्यमांशी बोलताना सांगितले. यावेळी प्रदीप आगरवाडेकर यांच्या पत्नी प्रिंशा आगरवाडेकर तसेच त्यांच्या मुली उपस्थित होत्या.

विजय सरदेसाई यांचा काडीमात्र संबंध नाही!

गोवा फॉरवर्ड पक्षाचे आमदार विजय सरदेसाई यांचा या प्रकरणाशी काडीचाही संबंध नसून त्यांचे केवळ आभार मानण्यासाठी पणजीत मी स्वत:हून त्यांची भेट घेतली होती, असे प्रिंशा आगरवाडेकर म्हणाल्या. पूजा शर्माविरोधात दाखल केलेली तक्रार मागे घेण्याचा निर्णय मी सरदेसाई यांच्या भेटीनंतरच घेतला हा केवळ योगायोग होता, असे त्या म्हणाल्या.