आसगावमधील घर पाडण्याच्या घटनेला ४ दिवस लोटले असूनही व मुख्यमंत्री प्रमोद सावंत यांनी मुख्य सचिवांना चौकशीचे आदेश दिले असूनही पोलिसांना अद्याप पूजा शर्माला अटक करण्यात अपयश आले आहे. पूजाला अटक करण्याची जोरदार मागणी विरोधी पक्षांनी केली आहे.
या घटनेत पोलिस अधिकारी स्वतःच गुंतल्याच्या आरोपामुळे या प्रकरणाचे शिंतोडे सरकारवर उडाले असून, पूजा शर्माचा पती एक तर पोलिस किंवा राजकीय नेता असावा, याबाबत उत्सुकता वाढली आहे. पोलिस प्रमुख जसपालसिंग यांनी शर्माचा पती आयपीएस नसल्याची माहिती आज ट्टवीटरद्वारे दिल्यानंतर सिंग यांना हा माणूस कोण आहे, याबाबत माहिती आहे, अशी चर्चा सुरू झाली आहे.
प्रसारमाध्यमांनी या प्रकरणाच्या मागे पोलिस प्रमुख जसपालसिंग हे स्वतः असल्यानेच बांधकाम मोडतेवेळी तेथे पोलिस संरक्षण देण्यात आले होते, असे सुतोवाच केले होते.
या प्रकरणात अद्याप दोघांना अटक करण्यात आली असून, पोलिसांवर मुख्य आरोपींना अटक करण्यासाठी दबाव वाढला आहे. या प्रकरणात डेव्हलपर अर्शद ख्वाजा याला अटक करण्यात आली होती व घर पाडतेवेळी तो तेथे उपस्थित होता. जेसीबी चालक प्रदीप राणा यालाही अटक करण्यात आली आहे. प्रदीप आगरवाडेकर व त्यांच्या मुलाला अपहृत केल्याचाही आरोप राणा याच्यावर आहे.
स्थानिक आमदार दिलायला लोबो यांनी या प्रकरणात आपल्या सरकारवर आरोप करून पोलिस त्यात गुंतल्याचे म्हटले होते. या प्रकरणात गोव्यातील भूमाफिया, जमीन प्रकरणे यावर चांगलाच उजेड पडला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.