Goa Aims to Become TB-Free Varsha Usgaonkar Joins Awareness Campaign

गोव्याला टीबीमुक्त करण्यासाठी सावंत सरकारकडून विविध उपक्रम राबवले जात आहेत. यातच आता, गोमंतकीयांमध्ये टीबीच्या रोगाबाबत जागृती करण्यासाठी गोव्याची लेक आणि मराठी सिनेसृष्टीतील प्रसिद्ध अभिनेत्री वर्षा उसगांवकर या पुढे सरसावल्या आहेत. होय, सोशल मीडियावर एक व्हिडिओ तूफान व्हायरल होत आहे, ज्यामध्ये टीबीबाबत जागृती करताना वर्षा उसगांवकर दिसत आहेत. संपूर्ण गोव्याला लवकरात-लवकर टीबीमुक्त करण्याचा मानस सरकारकडून व्यक्त करण्यात आला आहे.

व्हिडिओ पाहा

गोवा टीबीमुक्त करण्याचा संदेश

व्हिडिओमध्ये तुम्ही वर्षा उसगांवकर (Varsha Usgaonkar) यांना तुम्ही गोव्याला टीबीमुक्त करण्याचा संदेश देताना पाहू शकता. टीबी रुग्णांसाठी खबरदारी आणि वेळेवर उपचार घेणे किती गरजेचे आहे याबद्दल वर्षा उसगांवकर या व्हिडिओमध्ये सांगताना दिसत आहेत. टीबी रुग्णांनी आपल्या आरोग्याबाबत कोणत्याही प्रकारचा हालगर्जीपणा करु नये असेही त्यांनी पुढे सांगितले. यापूर्वीही, वर्षा उसगांवकर यांनी सरकारकडून गोमंतकीयांसाठी राबवलेल्या जागृती मोहीमांमध्ये हिरीरीने सहभाग घेतला आहे. व्यस्त कामातून वेळ काढून वर्षा उसगांवकर गोव्यात येत असतात.

गोव्याला टीबीमुक्त करण्यासाठी आम्ही कटिबद्ध

पंतप्रधान नरेंद्र मोदी यांच्या ‘टीबी मुक्त पंचायत’ उपक्रमांतर्गत, पंचायतींना सक्रिय उपाययोजना करण्यासाठी सक्षम करण्यात आलेले आहे. गोव्यात क्षयरोगाच्या रुग्णांना मोफत निदान चाचण्या, उपचार सेवा आणि पोषण सहाय्य पुरवले जाते. गोव्याला (Goa) ‘टीबी’मुक्त करण्यासाठी आम्ही कटिबद्ध आहोत, असे आरोग्यमंत्री विश्‍वजित राणे यांनी माध्यमाशी बोलताना सांगितले होते.