पणजी, राज्‍यात दोन आठवड्यांपासून पडत असलेल्‍या मुसळधार पावसामुळे जनजीवन विस्कळीत झालेच, शिवाय मोठ्या प्रमाणात शेतीला फटका बसला.

अनेक भागांतील भातशेतीत अजूनही पाणी साचून राहिले असल्याने कृषी अधिकाऱ्यांना पाहणी करणे कठीण बनले आहे, असे कृषी संचालक संदीप फळदेसाई यांनी सांगितले.

शेतीचे नुकसान झाले आहे, परंतु नेमके किती नुकसान झाले आहे, हे पाहणी केल्यावरच सांगता येईल. सद्यःस्थितीत अंदाज बांधणे कठीण आहे. कृषी अधिकारी नुकसानाची पाहणी करत असून, येत्या काही दिवसांत ती पूर्ण होईल.

शेतात अजूनही मोठ्या प्रमाणात पाणी साचलेले आहे. सरकार शेतकऱ्यांना सर्वतोपरी मदत करण्यास तत्पर आहे. त्यामुळे ज्या शेतकऱ्यांचे नुकसान झाले आहे, त्यांना योग्य ती मदत करण्यात येईल, असे फळदेसाई यांनी सांगितले.