आगोंद, पान्ना येथे फरिदाबाद, हरियाणा येथील पर्यटक चालकाने (जी ए ०७,टी०२५३) ‘रेंट अ कार’ने चुकीच्या दिशेने येऊन समोरून धडक दिल्याने झालेल्या अपघातात देसाईवाडा, आगोंद येथील संजू लक्ष्मण नाईक गावकर(५१), हे काल बुधवार, दि.१२ रोजी रात्री ८.४० च्या सुमारास गंभीर जखमी झाले.

काणकोण सामाजिक इस्पितळात उपचारावेळी त्यांचे निधन झाले, चालक अर्जुन सिंह(२५) याला पोलिसांनी अटक केली आहे. अधिक तपास पोलिस सहाय्यक निरीक्षक स्वदेश देसाई करत असल्याचे पोलिस निरीक्षक चंद्रकांत गावस यांनी सांगितले.

उत्तरीय तपासणी नंतर गावकर यांचा मृतदेह आज (गुरूवार) ११.४५ च्या सुमारास त्यांच्या निवासस्थानी आणण्यात आला. अंत्यदर्शनासाठी नागरिकांनी मोठी गर्दी केली होती. दुपारी २ च्या सुमारास अंत्यसंस्कार करण्यात आले.

यावेळी नातेवाईक, मित्रमंडळी व अन्य क्षेत्रातील मान्यवर मंडळींनी अंत्यदर्शन घेतले. संजू नाईक गावकर घरापासून एक कि.मी. वर राहणाऱ्या आपल्या राजू नामक जुळ्या भावाकडे नेहमीप्रमाणे आला होता.

रात्री ८.३५ च्या सुमारास घरी देसाईवाडा येथे दुचाकी (जीए १०,बी५३९६) घेऊन येत असताना आगोंद किनाऱ्याला भेट देऊन परत काणकोणच्या दिशेने जाणाऱ्या बोलेनो ‘रेंट अ कार’ ने अन्य एका जीपला ओव्हरटेक करताना समोरून येणाऱ्या दुचाकीला धडक दिली, तसेच ७ ते ८ मीटर फरफटत नेले, असे प्रत्यक्षदर्शींकडून सांगण्यात आले.

गंभीर जखमी झालेल्या दुचाकीस्वार संजूला १०८ ने काणकोण इस्पितळात दाखल केले. उपचार चालू असताना त्यांचे निधन झाले. निष्काळजीपणे वाहन चालवल्याबद्दल चालकाला अटक करून त्याच्याविरोधात गुन्हा नोंदवून तपास चालवल्याची माहिती पोलिस सूत्रांकडून देण्यात आली.

संजू गावकर यांच्या पश्‍चात पत्नी लिना, लहान मुलगी, विवाहित भाऊ सत्यवान, राजू, भावजया तसेच विवाहित बहिण रुपा, भावना, साधना, भावोजी पुतणे, पुतणी असा मोठा परिवार आहे.

आगोंद पंचायत क्षेत्रातील अरुंद रस्त्यावरून पर्यटक भाड्याने घेतलेली वाहने बेफामपणे हाकून स्थानिक नागरिकांची डोकेदुखी वाढवत आहेत. आतापर्यंत या पंचायत क्षेत्रात दररोज लहान-मोठे अपघात होत आहेत. या अपघातात बहुतेक पर्यटकच असलेले आढळून आले आहेत. काणकोण पोलिसांनी या अशा पर्यटकांना वठणीवर आणणे गरजेचे आहे.

किरण नाईक गांवकर, आगोंद स्पोर्ट्स क्लबचे माजी अध्यक्ष