म्हापसा: गोव्यात सध्या अपघातांचं प्रमाण बऱ्यापैकी वाढलंय. शनिवार (दि.२८ डिसेंबर) रोजी रात्रीच्या वेळी कामुर्ली रस्त्यावर एक भीषण अपघात झाला. या अपघातात एका चारचाकी गाडीने दुचाकीला धडक दिली, ज्यामध्ये दोन युवक गंभीर जखमी झाले आणि ॲरॉन फर्नांडिस (२६) याचा जागीच मृत्यू झाला. अपघातानंतर चारचाकी चालकाने त्वरित पळ काढला मात्र स्थानिकांच्या मदतीने जखमी युवकाला वेळेत उपचारांसाठी हॉस्पिटलमध्ये दाखल करण्यात आले.

भरधाव वेगात जाणाऱ्या चारचाकीने दुचाकीला जबर धडक दिली, यामुळे ऋग्वेद बांदोडकर यांच्या डोक्याला मार बसला, डावा पाय फ्रॅक्चर झाला आणि इतर शरीराला देखील दुखापत झाली. या भीषण अपघातात ॲरॉन फर्नांडिस मात्र कंपाउंडच्या भिंतीवर आदळला आणि डोक्याला गंभीर दुखापत झाल्याने जागीच त्याला प्राण गमवावे लागले.

स्थानिकांच्या मदतीने ऋग्वेदला प्राथमिक उपचारांसाठी जिल्हा रुग्णालयात दाखल करण्यात आले आणि त्यानंतर पुढील उपचारांसाठी गोवा मेडिकल कॉलेजमध्ये हलवण्यात आले. मृत ॲरॉन फर्नांडिस हा शिवोली येथील रहिवासी होता आणि त्याचा मृतदेह शवविच्छेदनासाठी पाठवण्यात आलाय. या अपघाताचा पंचनामा म्हापसा पोलीस हवालदार शिवाजी शेटकर यांनी केला तर पुढील तपास सध्या पोलीस उपनिरीक्षक आदित्य गाड करीत आहेत.