Goa ABVP Member Threatened Director Of Student Welfare: गोवा विद्यापीठातील निवडणूक रद्द प्रकरणाने वेगळे वळण घेतले आहे. अभाविप संघटनेच्या एका कार्यकर्त्याने विद्यार्थी कल्याण संचालकांना कार्यालयातून बाहेर पडल्यास दंडुक्याने मारण्याची धमकी दिली. त्यामुळे येथील वातावरण तापले आहे.

जर हा विद्यार्थी प्राध्यापकांना धमकावू शकतो तर विद्यार्थ्यांनादेखील काहीही करू शकतो. त्यामुळे विद्यार्थी भयभीत झाले आहेत.

आम्हाला विद्यापीठात राजकारण आणायचे नाही, त्यामुळे कुलगुरूंनी या प्रकरणाची गांभीर्याने दखल घेऊन कारवाई करण्याची मागणी टुगेदर फॉर युनिव्हर्सिटी संघटनेचे उमेदवार ऋषांक नाईक यांनी केली.

ते गोवा विद्यापीठ आवारात आयोजित पत्रकार परिषदेत बोलत होते. यावेळी गोवा विद्यापीठ विद्यार्थी संघटनेचे अध्यक्ष साहिल गाड, अपूर्वा नाईक तसेच इतर विद्यार्थी उपस्थित होते.

उमेदवारांना धमक्या

जो विद्यार्थी दांडा घेऊन मारायला गेला होता, त्या विद्यार्थ्याने आमच्या पॅनलच्या अनेक उमेदवारांना धमकावण्याचा प्रयत्न केला आहे. तुम्ही अमुक ठिकाणाहून विद्यापीठात येता.

तुमच्याबद्दल आम्हाला माहिती आहे. तुम्ही जर आमच्या बाजूने आला नाहीत तर निवडणुकाच होऊ देणार नसल्याचे देखील त्या विद्यार्थ्याने सांगितले होते, असे अपूर्वा नाईक यांनी सांगितले.