Goa News: गोवा सरकारने गुजरातप्रमाणेच दारु बंदी जाहीर करायला हवी, पूर्ण बंदी शक्य नसेल तर किमान निर्बंध तरी लादावेत. बार व मद्यविक्री दुकानांची संख्या कमी करावी, रात्री 10 नंतर सर्व बार बंद असावेत, वाहन चालकांची सक्तीने चाचणी घेण्यात यावी.

पर्यटन स्थळाच्या नावाखाली मद्यपानाला मुक्त हस्त देवून जीवांशी खेळू नये, असा सल्ला मॅगसेसे पुरस्कार प्राप्त सामाजिक कार्यकर्ते अभय बंग यांनी दिला आहे. महाराष्ट्र ऑर्थोपेडिक डॉक्टर संघटनेची 38 वी वार्षीक परिषद दोनापावला येथील एका तारांकित हॉटेलमध्ये झाली.

गडचिरोली सारख्या आदिवासी भागात निस्वार्थ सेवा बजावणारे आंतरराष्ट्रीय किर्तीचे डॉक्टर अभय बंग यांनी उपस्थितांना मार्गदर्शन केले. दारू सोडण्यावर भर देताना अपघाताचे मूळ कारण दारुचे व्यसन आहे. गडचिरोली जिल्ह्यातील काही गावात दारु विक्री बंद करण्यात आली हा मोठा निर्णय होता, असे ते म्हणाले.

महिन्याला 20 लोकांचा मृत्यू-

दारू पिल्यामुळे यकृत निकामी होते. राज्यात दर महिन्याला किमान 20 जणांचा गोवा वैद्यकीय महाविद्यालयात मृत्यू होतो. दारुमुळे अपघातही वाढत आहेत. किमान 10 युवक ठार होत आहेत. दारुमुळे आपण कितीतरी लोक गमावत आहोत, असे गोमेकॉचे डीन बादेकर यांनी सांगितले.