37th National Games 2023 गोव्यात होत असलेल्या 37 व्या राष्ट्रीय क्रीडा स्पर्धेच्या उद्‍घाटन समारंभास उपस्थित राहण्याची संधी राज्यातील प्रथम नोंदणी करणाऱ्या पहिल्या शंभर शाळांना मिळणार आहे.

26 ऑक्टोबर रोजी फातोर्डा येथील पंडित जवाहरलाल नेहरू स्टेडियममध्ये सायंकाळी 4.30 वाजता या स्पर्धेचा उद्‍घाटन समारंभ पार पडणार आहे. पंतप्रधान नरेंद्र मोदी या कार्यक्रमास प्रमुख पाहुणे म्हणून उपस्थित असणार आहेत.

सरकारी, अनुदानित आणि विना अनुदानित माध्यमिक आणि उच्च माध्यमिक शाळांमधील प्रत्येकी ३० विद्यार्थी आणि दोन शिक्षकांना या कार्यक्रमाला उपस्थित राहता येईल. विद्यार्थिनी असतील, तर महिला शिक्षिकांना उपस्थित राहता येईल.

उद्‍घाटन समारंभापूर्वी चार वाजता स्टेडियमस्थळी विद्यार्थ्यांच्या ओळखपत्रांसह माहिती देणे बंधनकारक आहे. या ठिकाणी ये-जा करण्यासाठी बालरथाचा वापर करता येऊ शकतो, असे शिक्षण संचालनालयाचे संचालक शैलेश झिंगडे यांनी परिपत्रकात म्हटले आहे.

या परिपत्रकाची प्रत सरकारी, अनुदानित आणि विना अनुदानित माध्यमिक व उच्च माध्यमिकच्या प्रमुखांना पाठविण्यात आली आहे.

नाविन्यपूर्ण क्रीडानगरी

मुख्यमंत्री डॉ. सावंत म्हणाले, की कांपालची क्रीडानगरी चार-पाच दिवसांत उभी राहील. ही एक नाविन्यपूर्ण क्रीडानगरी असेल. या क्रीडानगरीस लोकांनी मोठ्या संख्येने भेट द्यावी, यासाठी आमचा प्रयत्न आहे. क्रीडानगरीमुळे संभाव्य गर्दी लक्षात घेऊन कांपाल ते मिरामार परिसरात वाहतूक कोंडी होऊ नये, यासाठी वाहतूक पोलिस विभागाला योग्य नियोजन करण्यास सांगितले आहे.