पणजी: गोवा वैद्यकीय महाविद्यालयाच्या परिसरातील जुन्या इमारतीपासून नवीन विशेषज्ञ विभागाकडे जाणाऱ्या पादचारी मार्गाच्या दगडी फरशांखालून गेलेल्या जलवाहिनीला गळती लागली आहे,असे आप प्रदेशाध्यक्ष अमित पालेकर यांनी सांगितले.

फळविक्रेत्यांच्या मागे असलेल्या दोन मोठ्या टाक्यांमधून हजारो लिटर पाण्याची गळती होऊन ते वाया जात आहे.

गोवा वैद्यकीय महाविद्यालय प्रशासन आणि सार्वजनिक बांधकाम विभाग (पीडब्ल्यूडी) यांना वारंवार तक्रारी देऊनही दोन्ही विभाग जबाबदारी झटकत आहेत. जीएमसी प्रशासन म्हणते की हे पाणी साबांखाच्या पाणीपुरवठा योजनेतील आहे.

तर ‘साबांखा’ म्हणते की, हा प्रकार ‘गोमेकॉ’च्या अखत्यारित येतो. परिणामतः सरकारी यंत्रणेतील अनागोंदीमुळे हजारो लिटर पिण्याचे पाणी रस्त्यावर वाहून जात आहे. या सरकारला लोकांच्या समस्या सोडवायच्या नाहीत, फक्त जबाबदारी नाकारायची आहे. ऐन उन्हाळ्यात आणि एकीकडे पाणी टंचाई सुरू असताना हजारो लिटर पाणी वाया जात आहे. त्यात सरकारी यंत्रणेचा मूळ दोष आहे.

राज्यातील सर्वात मोठ्या सरकारी रुग्णालयाच्या आवारात हजारो लिटर पाण्याचा अपव्यय होत आहे. गोमेकॉत अचानक भेटी देणाऱ्या आरोग्य मंत्र्यांनी या प्रकाराची गंभीरपणे दखल घ्यावी, असे पालेकर यांनी सूचित केले आहे.