Onam In Goa: राजा महाबलीचे स्वागत आणि अन्य पारंपरिक कार्यक्रमांसह आज (रविवारी) डिचोलीत केरळ समाज बांधवांतर्फे ‘ओणम’ उत्साहात साजरा करण्यात आला. या उत्सवाच्या माध्यमातून डिचोलीवासियांना केरळ संस्कृतीचे दर्शन घडले. डिचोली शहर आणि परिसरात वास्तव्य करून राहणाऱ्या केरळीय बांधवांच्या 'कल्पका कल्चरल असोसिएशन'तर्फे हा उत्सव साजरा करण्यात आला.

ओणम म्हणजे केरळमधील नवीन वर्षाची सुरवात. ओणमच्या दिवशी राजा महाबली पृथ्वीवर येतात,अशी केरळी जनतेची भावना असून त्यांच्या आगमनाप्रित्यर्थ हा उत्सव साजरा होतो. बोर्डे श्री महामाया देवस्थानात आयोजित कार्यक्रमास प्रमुख पाहुणे म्हणून आमदार डॉ. चंद्रकांत शेट्ये,आमदार प्रेमेंद्र शेट तसेच डिचोली, साखळीचे नगराध्यक्ष अनुक्रमे कुंदन फळारी आणि रश्मी देसाई, वासू नायर, ‘कल्पका’चे अध्यक्ष जयप्रकाश, प्रसाद नायर उपस्थित होते.

‘पोकल्लम’ विजेत्यांना बक्षिसे

राजा महाबलीची वेशभूषा केलेल्या व्यक्तीसह मान्यवरांचे वाजतगाजत उत्सवस्थळी आगमन होताच आयोजकांतर्फे मान्यवरांचे स्वागत करण्यात आले. मान्यवरांच्या हस्ते केरळ समाजातील हुशार विद्यार्थ्यांना गौरविण्यात आले. तसेच ‘पोकल्लम’ (फुलांची रांगोळी) स्पर्धेतील विजेत्यांना बक्षिसे वितरीत करण्यात आली. यावेळी केरळ संस्कृतीची ओळख करून देणारे विविध सांस्कृतिक कार्यक्रम पार पडले.

केरळ संस्कृतीचे कौतुक

आमदार डॉ. चंद्रकांत शेट्ये आणि प्रेमेंद्र शेट यांनी केरळी संस्कृतीचे कौतुक करताना गोव्याच्या आणि केरळमधील संस्कृतीमध्ये साम्य असल्याचे गौरवोद्गार काढले. गोव्याच्या विकास प्रक्रियेत केरळी बांधवांचे लक्षणीय योगदान असल्याचेही त्यांनी स्पष्ट केले. कुंदन फळारी, रश्मी देसाई आणि वासू नायर यांनीही मनोगत व्यक्त केले.