Girl Death in Goa : गोव्यात भाटी नेसई येथे सहावीत शिकत असलेल्या मुलीबाबत अतिशय दुःखद घटना घडली आहे. शनिवारी राहत्या घरी पडून जखमी झालेल्या 10 वर्षीय मुलीचा मृत्यू झाला आहे.

मायणा-कुडतरी पोलिसांनी दिलेल्या माहितीनुसार, सहावीत शिकणारी पीडित मुलगी तिच्या लहान बहिणीसोबत टीव्ही पाहत असताना ही घटना घडली. बेडवर खुर्ची ठेऊन ती टीव्ही पाहत असताना अचानक ती खुर्चीवरून खाली पडली. पडल्यानंतर तिला डोक्याला आणि चेहऱ्याला गंभीर दुखापत झाली.

यानंतर तिला ताबडतोब मडगावमधील दक्षिण गोवा जिल्हा रुग्णालयात नेण्यात आले आणि नंतर गंभीर अवस्थेत तिला जीएमसी येथे हलविण्यात आले. मात्र या सगळ्यात तिचा मृत्यू झाला. या घटनेमुळे परिसरात हळहळ व्यक्त होत आहे.

दरम्यान, जुने गोवे येथे काल सकाळी सोमू शर्मा हा तीन वर्षांचा मुलगा हरवला होता. बराच वेळ शोधाशोध करूनही तो न सापडल्यामुळे त्याच्या नातेवाईकांनी जुने गोवे पोलिस स्थानकात तक्रार नोंदवली.

याची त्वरित दखल घेऊन आज दुपारी पोलिसांनी शोध मोहीम सुरू केली. अखेर तो मुलगा जुने गोवे परिसरातच पोलिसांना सापडला. त्याला ताब्यात घेऊन नंतर त्याचे काका राजकुमार शर्मा यांच्याकडे त्याला सोपविण्यात आले. मुलगा शोधण्यासाठी सहकार्य केल्याबद्दल शर्मा कुटुंबीयांनी जुने गोवे स्थानक पोलिसांचे आभार मानले.