फातोर्डा: गोव्यात सर्वधर्म समभाव अस्तित्वात असल्याची प्रचिती वेळोवेळी येत असते, या राज्यात सर्व धर्माचे लोक गुण्यागोविंदाने नांदत असतात, अशीच परंपरा जपली आहे. सासष्टीतील उतोर्डा येथील ख्रिश्‍चन बांधवांनी गणेशचतुर्थीच्या निमित्ताने दरवर्षी येथील ख्रिश्‍चन बांधव स्थानिक हिंदू बांधवांना सणाचा आनंद द्विगुणित करण्यासाठी भेट वस्तू देण्याची परंपरा जोपासत आहेत.

(Gifts from Christian brothers to Hindus at Salcete on the occasion of Ganesh Chaturthi)

युनायटेड क्लब ऑफ उतोर्डाचे अध्यक्ष रेमी परेरा व त्यांचे स्थानिक सहकारी गणेश चतुर्थीच्या दोन दिवसापूर्वी उतोर्डा परिसरातील हिंदू बांधवांच्या घरी भेट देऊन त्यांना भेटवस्तू प्रदान करीत असतात. ख्रिश्‍चन बांधवांकडून देण्यात येणारी भेट येथील हिंदू बांधव हसतमुखाने स्वीकार करीत असतात. तसेच येथील हिंदू बांधवही ख्रिश्‍चन बांधवांच्या ख्रिसमस सणाला न चुकता सहभागी होऊनआपले नाते जोपासत असतात.

ही परंपरा येथे मागील कित्येक वर्षांपासून सुरु आहे. ख्रिश्‍चन बांधवांकडून हिंदू बांधवांना देण्यात येणाऱ्या भेट वस्तूत माटोळीच्या फळांचा, भाजीपाल्याच्या सामानाचा समावेश असतो. यावर बोलताना रेमी म्हणाले, आम्ही राज्यात सर्वधर्म समभाव व एकता राखण्यासाठी आम्ही ही परंपरा जोपासत आहोत. एकमेकाच्या सुखदुःखात सहभागी होऊन यापुढेही हे कार्य असेच सुरु ठेवणार असल्याचे रेमी यांनी सांगितले.