German President Olaf Scholz Visits Goa

पणजी: जर्मनीचे राष्ट्राध्यक्ष ओलाफ स्कोल्झ यांनी आज राज्याचा धावता दौरा केला. त्यांनी मुरगाव बंदरात सदिच्छा भेटीवर आलेल्या जर्मन युद्धनौकांना भेट दिली आणि बिटस् पिलानीच्या विद्यार्थ्यांशी संवाद साधला. गेले तीन दिवस भारताच्या दौऱ्यावर असलेल्या स्कोल्झ यांनी दौऱ्याचा समारोप गोवा भेटीने केला.

दाबोळी येथील हंस नौदल तळावर मुख्यमंत्री डॉ. प्रमोद सावंत यांनी कुणबी शाल आणि पारंपरिक समई प्रदान करून त्यांचे स्वागत केले. यावेळी केंद्रीय बंदर राज्यमंत्री श्रीपाद नाईक, संरक्षण राज्यमंत्री संजय सेठ, शिष्टाचारमंत्री मॉविन गुदिन्हो आणि शिष्टाचार सचिव संजीत रॉड्रिग्ज उपस्थित होते.

पारंपरिक लोकगीतही त्यांच्या स्वागताच्या निमित्ताने सादर करण्यात आले. मुरगाव बंदरात नांगरण्यात आलेली जर्मन युद्धनौका बादेन वुवरटमर्ग आणि साहाय्य नौका फ्रॅंकफर्ट एम मेन यांना भेटी दिल्या. यावेळी नौदल कर्मचाऱ्यांशी त्यांनी संवाद साधला.

भारताला मिळणार जर्मनीची मदत

विद्यार्थ्यांशी संवाद साधताना ते म्हणाले, येत्या काही दिवसांत जर्मनी भारताला ऊर्जा संक्रमणामध्ये मदत करण्याची भूमिका बजावू शकते. भारतातील नागरिकांच्या चांगल्या, आरोग्यदायी आणि स्वच्छ भविष्यासाठी जर्मनी आणि भारत योगदान देतील. स्कोल्झ यांनी बिट्स पिलानीच्या विद्यार्थ्यांनी तयार केलेले चार प्रकल्प पाहिले. प्रकल्प निर्मिती प्रक्रियेत सहभागी असलेल्या विद्यार्थ्यांशीही त्यांनी संवाद साधला.