म्हापसा: म्हापसा शहरातील विविध ठिकाणी सध्या ब्लॅक स्पॉट्स, कलेक्शन पॉइंट्स व रस्त्यांच्या कडेला मोठ्या प्रमाणात कचऱ्याचे ढीग जैसे थे स्थितीत पडून आहेत. हा कचरा उचलण्यास पालिकेजवळ वेळ नाही; परंतु रहिवासी नसलेल्या खासगी इमारतींमधील कचरा उचलण्यास पालिकेचे कर्मचारी जुंपले जात असल्याने पालिकेच्या या अजब कारभाराबाबत नगरसेवकांनी तीव्र शब्दांत संताप व्यक्त केला.

तसेच या प्रकारात गुंतलेल्या संबंधितांना निलंबित करावे, अशी मागणी नगरसेवक प्रकाश भिवशेट यांनी केली.

याविषयी नगरसेवक अ‍ॅड. शशांक नार्वेकर यांंनी माहिती दिली की, आपल्या प्रभागात नवीन प्रकल्प आला आहे. तिथे अद्याप कुणीही रहिवासी राहत नाही. तरीही पालिकेच्या सात कर्मचाऱ्यांनी शुक्रवारी तेथील कचरा उचलला.

नगरसेवकांकडून संताप व्यक्त

दरम्यान, नुकतीच म्हापसा पालिकेत नगरसेवकांसोबत शहरातील कचरा व्यवस्थापन कोलमडल्याने संयुक्त बैठक झाली होती. यावेळी नगरसेवकांनी पालिका अधिकारी, अभियंते, पर्यवेक्षक व कर्मचाऱ्यांच्या भोंगळ कारभाराविषयी धारेवर धरले होते.

तेव्हा तीन दिवसांत कचरा उचलला जाईल, असे आश्वासन उपस्थितांना देण्यात आले होते. परंतु अद्याप कचरा उचलण्यास पालिकेला वेळ मिळालेला नाही. मात्र, खासगी इमारतींमधील कचरा उचलण्यास पालिका वेळ आणि मनुष्यबळ उपलब्ध करीत असल्याने नगरसेवकांनी संताप व्यक्त केला.