फातोर्डा: मडगाव नगरपालिकेचे कचरावाहू ट्रक आणि कॉम्पॅक्टर अत्यंत जुने झाले असून अनेकवेळा ते काम सुरू असतानाच नादुरुस्त होतात. याबरोबरच त्यांचे टायरही पंक्चर होतात. अशाने कचरा उचल वेळेवर होत नसल्याने तो काही दिवस तसाच पडून राहतो. शिवाय नागरिकांना दुर्गंधीचाही त्रास सहन करावा लागतो.

सोमवारी आके येथील सिने विशांत थिएटरजवळ कचरा वाहतूक करणाऱ्या एका ट्रकचा टायर सकाळच्या सत्रात पंक्चर झाल्याने काही तासांसाठी कचरा उचल ठप्प पडली होती. सकाळी 8 वाजता पंक्चर झालेल्या या ट्रकची दुरुस्ती 11 वाजल्यानंतर पूर्ण करण्यात आली.

भंगार कचरा वाहनांसाठी त्रासदायक

चार दिवसांपूर्वी एक ट्रक नादुरुस्त झाल्याने आके, पॉवर हाऊस व अन्य ठिकाणची कचरा उचल चार-पाच दिवस करण्यात आली नव्हती. यातील काही ठिकाणी कचऱ्याला उग्र वास येत होता. मडगाव नगरपालिकेतील कचरा वाहतूक करण्यासंबंधी निगडित असलेल्या एका कर्मचाऱ्याने ट्रकविषयी सांगितले, की सोनसोडो कचरा यार्डवर लोखंडी भंगाराचा कचरा येतो. यात लोखंडी टोकदार वस्तू तसेच खिळेही असतात. त्यामुळे कचरा वाहतूक करणारे ट्रक वारंवार पंक्चर होतात.

कचरा वाहतूक करणारे ट्रक आणि कॉम्पॅक्टर अत्यंत जुने झाले आहेत. एकंदरीत ८ वाहने कचरा वाहतुकीसाठी वापरण्यात येत आहेत. या जुन्या झालेल्या ट्रकच्या जागी नवे ट्रक घेण्याच्या प्रक्रियेला सुरुवात करण्यात आली आहे.

- आग्नेल फर्नांडिस