पणजी: तिसवाडी तालुक्यातील मेरशी, चिंबल तसेच सांताक्रुझ पंचायत परिसरात अजूनही कचऱ्याचे ढीग (ब्लॅकस्पॉटस्) अजूनही असल्याचे तसेच मेरशी ते रायबंदर रस्त्याच्या बाजूने स्क्रॅपयार्ड उभे राहिले असल्याची माहिती ॲड. आयरिशरॉड्रिग्ज यांनी निदर्शनास आणून देताच मुंबई उच्च न्यायालयाच्या गोवा खंडपीठाने या पंचायतींची कानउघाडणी करत येत्या १३ एप्रिलपर्यंत स्थिती अहवाल सादर करण्याचा आदेश दिला.

मेरशी, चिंबल व सांताक्रुझ या परिसरातील कचऱ्यांचे ढीग अजून निदर्शनास येत असल्याची छायाचित्रे खंडपीठासमोर अर्जासोबत सादर केली. यावेळी पंचायतींच्या वकिलांनी कचरा विल्हेवाटीसंदर्भात तसेच एमआरएफ सुविधा उभारण्यात येत असलेल्या अडचणींचा उल्लेख केला, तर छायाचित्रात दिसत असलेला कचरा उचलण्यात आल्याची माहिती वकिलांनी दिली. गोवा खंडपीठाने मांडण्यात आलेली कारणे याची दखल न घेता दिलेल्या निर्देशांची अंमलबजावणी करण्याचे आदेश दिले.

वारंवार निर्देश देऊनही फक्त कारणे पुढे केली जातात, तर यासंदर्भात ॲडव्होकेट जनरलांना नियमानुसार पुढील कारवाईसाठी संबंधित खात्याच्या अधिकाऱ्यांना पावले उचलण्याच्या सूचना केल्या. या स्वेच्छा याचिकेवरील सुनावणीवेळी पंचायतींकडून कचरामुक्तसंदर्भात प्रतिज्ञापत्र दिले जाते. मात्र, प्रत्यक्षात अनेक ठिकाणी हे कचऱ्याचे ढीग आढळून येत आहेत. त्यामुळे ते उचलण्यासंदर्भात केलेल्या कृतीची माहिती देण्याचे निर्देश खंडपीठाने दिले.