पणजी: पैंगीणमध्‍ये गावडोंगरी येथे आयोजित गोवा फॉरवर्डच्‍या बैठकीला आक्षेप घेणाऱ्या उपजिल्‍हाधिकारी प्रतापराव नाईक गावकर आणि सहाय्‍यक निवडणूक अधिकारी विपुल नाईक गावकर या दोघांची तत्‍काळ बदली करावी तसेच बैठकीत येऊन दादागिरी करणाऱ्या निरीक्षक हरीष राऊत यांच्‍यावर चोवीस तासांत कारवाई करावी, अशी मागणी गोवा फॉरवर्डच्‍या शिष्‍टमंडळाने सोमवारी राज्‍य निवडणूक आयुक्तांकडे केली.

गोवा फॉरवर्डचे उपाध्‍यक्ष दिलीप प्रभुदेसाई, प्रवक्‍ते विकास भगत आदींच्‍या शिष्‍टमंडळाने राज्‍य निवडणूक आयुक्त मिनिनो डिसोझा यांची भेट घेत, २९ नोव्‍हेंबर रोजी पैंगीणमध्‍ये घडलेल्‍या घटनेचा निषेध नोंदवला.

गोवा फॉरवर्डने पैंगीणमधील बैठकीसाठी आचारसंहिता लागू होण्‍याआधीच २६ नोव्‍हेंबरला परवानगी घेतली होती. ध्वनी परवानगीसाठी उपजिल्‍हाधिकाऱ्यांकडे परवानगी मागितली होती. परंतु, त्‍यांनी त्‍यासाठी सहाय्‍यक निवडणूक अधिकाऱ्यांची परवानगी घेण्‍यास सांगितले.

त्‍यानुसार तसा अर्ज आम्‍ही निवडणूक अधिकाऱ्यांना केला होता. त्‍यानंतरच २९ ला बैठकीचे आयोजन केले. परंतु, बैठक सुरू झाल्‍यानंतर पाऊण तासांनी तेथे येऊन निरीक्षक राऊत यांनी आचारसंहितेचा भंगचा ठपका ठेवत बैठक बंद करण्‍याचे निर्देश दिले. या तिघांनीच आचारसंहितेचा भंग केलेला आहे, असे विकास भगत म्‍हणाले.