Goa Forward: गोवा फॉरवर्डची ‘आमचो आवाज विजय’ मोहीम! जाणून घेणार लोकांचे प्रश्‍न; पेडण्यातून होणार सुरुवात

पणजी: आगामी विधानसभेच्या पावसाळी अधिवेशनात जनतेचे प्रश्‍न जाणून घेण्यासाठी ‘गोवा फॉरवर्ड’चे आमदार विजय सरदेसाई हे राज्यात तालुकावार बैठका घेणार आहेत. त्याची सुरुवात पेडण्यातून २९ जूनपासून सुरू होणार असून ११ जुलै रोजी सांगे तालुक्यात समाप्ती होईल.

हे सरकार सर्व स्तरावर अपयशी ठरले आहे त्यामुळे लोकांच्या समस्या विधानसभेत मांडून सकारात्मक टीकेमधून सरकारला तोडगा काढण्यास भाग पाडतील. ‘आमचो आवाज विजय’ या उपक्रमाद्वारे सर्व तालुक्यातील मतदारसंघातील नागरिकांना भेटणार असल्याची माहिती पक्षाचे सरचिटणीस (संघटन) दुर्गादास कामत यांनी दिली.

नागरिकांना त्यांचे प्रश्‍न व समस्या पाठवण्यासाठी पक्षाने ऑनलाईन सुविधाही ठेवली आहे. त्यांच्या या समस्या १० जुलैपूर्वी publicsuggestions@goaforward.in या संकेतस्थळावर पाठवाव्यात. पक्षाध्यक्ष विजय सरदेसाई यांनी त्यांच्या वाढदिनी आश्‍वासन दिले होते की, ते राज्यभरातील लोकांपर्यंत वैयक्तिकरित्या पोहोचतील आणि त्यांचे प्रश्न ऐकतील.

त्यानुसार या संपर्काची रचना दोन टप्प्यात केली आहे. राज्यात वीज आणि पाण्याची कमतरता, खड्डे पडलेले रस्ते, बेरोजगारी, मोडकळीस आलेल्या शाळा किंवा मूलभूत आरोग्य सुविधांचा अभाव या सरकारच्या अपयशांमुळे जनतेच्या तक्रारींची संख्या वाढत आहे.