सुशांत कुंकळयेकर
पायाला गोळी लागलेली असताना आपला जीव वाचविण्यासाठी धावणारा गुंड आणि नंग्या तलवारी घेऊन त्याचा पाठलाग करणारे आणखी पाचजण. अगदी सिनेमात शोभावे असे हे दृष्य दोन वर्षांपूर्वी फातोर्डा येथील लोकांनी आपल्या डोळ्यांनी पाहिले. भरदुपारी भरवस्तीत झालेल्या या गँगवारच्या आठवणी लोक अजूनही विसरलेले नाहीत.
१६ फेब्रुवारी २०२१ रोजी फातोर्ड्यातील लोकांनी हा भयानक प्रकार आपल्या डोळ्यांनी पाहिला. कुख्यात गुंड शेख अन्वर ऊर्फ टायगर याच्यावर विरोधी गटाने हा हल्ला केला होता. गोव्यात त्यावेळी चालू असलेल्या वाळूतस्करीतील दुश्मनी त्यामागे असल्याचे सांगितले जात होते. या प्रकरणात नंतर फातोर्डा पोलिसांनी रिकी वर्णेकर, इम्रान बेपारी आणि अन्य गुंडांना अटक केली होती. दुपारी सव्वाएकच्या सुमारास ही थरारक घटना घडली होती.
गुंड अन्वर याला ठार मारण्यासाठी भरदिवसा हा हल्ला करण्यात आला होता. त्याचा खात्मा करण्यासाठीच हे बुरखाधारी गुंड रस्त्यावर उतरले होते. त्यांच्या हातात तलवारी, लोखंडी सळ्या, सुरे अशी घातक शस्त्रे होती. त्यातील एकाने जीव घेऊन पळणाऱ्या अन्वरवर गावठी कट्ट्याने गोळी झाडल्याने तो जबर जखमी झाला होता.
मात्र अन्वरच्या चांगल्या नशिबाने त्याचवेळी तेथून पोलिसांचे वाहन जात असल्यामुळे मारेकऱ्यांनी त्याचा पाठलाग सोडून दिला होता. निवृत्त पोलिस अधीक्षक सॅमी तावारीस यांनी त्यावेळी आपला जीव धोक्यात घालून यातील एका गुंडाला अटक केली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.