Goa Crime News: सराईत गुंड सूर्यकात कांबळी ऊर्फ सूर्या (५५) याच्यावर पूर्ववैमनस्यातून दोघा बुरखाधारी हल्लेखोरांनी चॉपर व सुरीने प्राणघातक हल्ला करून पोबारा केला.

टोंक-करंझाळे येथे घडलेल्‍या या हल्ल्यात सूर्या गंभीर जखमी झाला असून, त्याच्यावर गोमेकॉत उपचार सुरू आहेत.

विविध पोलिस स्थानकांत त्याच्यावर 8 गुन्हे नोंद आहेत. त्याची प्रकृती सुधारत असल्‍याची माहिती पोलिसांनी दिली. शंकरवाडी-ताळगाव येथे आपल्‍या कुटुंबासोबत राहत असलेला सूर्या हा अट्टल गुंड आहे.

त्याच्याविरोधात जीवे मारण्याची धमकी देणे, मारहाण करणे तसेच शस्त्रे बाळगण्याचे गुन्हे आहेत.

पणजी, पेडणे, डिचोली व कळंगुट पोलिसांत हे गुन्‍हे नोंद असून सध्या तो सशर्त जामिनावर आहे. त्याच्या चेहऱ्यावर सुरीने वार केल्‍याने अनेक जखमा झाल्या असून, डॉक्टरांनी त्यावर टाके घातले आहेत.

बार अँड रेस्टॉरंटच्‍या बाहेर रक्तबंबाळ अवस्थेत पडलेल्या सूर्यावर झालेल्या हल्ल्याची माहिती पोलिसांना देण्यात आली. तसेच १०८ रुग्णवाहिका बोलावून त्याला इस्पितळात दाखल करण्यात आले.

घटनास्थळी सूर्याने हल्लेखोराच्या हातातून हिसकावून घेतलेला चॉपर पडला होता, तो पोलिसांनी ताब्‍यात घेतला. सीसीटीव्ही कॅमेऱ्याच्‍या साहाय्‍याने पोलिसांनी हल्लेखोरांचा शोध सुरू केला आहे. त्‍यांना काही धागेदोरे सापडले आहेत.

दारू पिण्‍यासाठी एकटाच आला अन्‌

• सूर्याचे इतर गुन्हेगारांशी वैर होते. विरोधी गटातील गुंड त्याचा काटा काढण्याची संधी शोधत होते.

• सूर्या नेहमी आपल्याबरोबर आणखी दोन-तीन साथीदारांना घेऊन फिरत असे.

• सूर्या दररोज रात्री दारू पिण्यासाठी करंझाळे येथील ‘फर्न’ बार अँड रेस्टॉरंटमध्‍ये जात असे.

• रात्री दहाच्या सुमारास तो दारू पिऊन बाहेर आला असता बुरखा घातलेल्‍या दोघा युवकांनी त्‍याच्‍यावर सुरी व चॉपरने हल्ला चढवला.

• सूर्याने हल्लेखोराच्या हातातील चॉपर हिसकावून घेतला. त्यामुळे त्याच्या हाताला गंभीर जखमा झाल्या.

• दुसऱ्या हल्लेखोराने सूर्याच्‍या चेहऱ्यावर सुरीने वार केले. त्‍यानंतर दोघेही हल्लेखोर धावत पसार झाले.