बार्देश: फुटसाल मैदानावरून हळदोणे पंचायतीने बोलावलेली विशेष ग्रामसभा गाजली. सभेला २६० ग्रामस्थांनी उपस्थिती लावली होती. यावेळी सर्व पंचायत सदस्य उपस्थित होते.

पंचायत क्षेत्रात फुटसाल मैदानाला विरोध नाही, मात्र त्याच्या सध्याच्या स्थानाला विरोध आहे, असे पंच विल्यम यांनी सांगितले. तसेच या प्रकल्पासाठी दुसरे स्थान शोधावे अशी विनंती केली. यावेळी आमदार अॅड. कार्लुस फेरेरा यांनी ग्रामस्थांना दोन महिन्यांच्या आत पर्यायी जागा सूचवण्याचे आवाहन केले.

सरपंच आश्विन डिसोझा यांनी सांगितले की, फुटसाल मैदान हा प्रकल्प थेट क्रीडा प्राधिकरणामार्फत राबवला जात आहे. हळदोणे पंचायतीचा या प्रकल्पाशी काहीही संबंध नाही तसेच पंचायतीतर्फे या प्रकल्पावर कोणताही आर्थिक खर्च करण्यात येत नाही. ग्रामस्थांनी चिंता व्यक्त केल्यामुळे आम्ही त्यांची मने दुखवू इच्छित नाही, म्हणूनच आम्ही ही बैठक बोलावली आहे, असे त्यांनी स्पष्ट केले.

आमदार फेरेरा यांनी प्रकल्पाचा कायदेशीर पैलू आणि न्यायालयाच्या निर्देशानुसार मैदानाच्या वापराबाबत ग्रामसभा सदस्यांना सविस्तर माहिती देताना सांगितले की, हे मैदान सर्वांचे आहे. काही लोकांमध्ये गैरसमज आहे की हे मैदान एका विशिष्ट शाळेसाठी केले गेले आहे, पण तसे अजिबात नाही.

हे मैदान सर्वांसाठी खुले आहे. जागेचा मोठा अभाव असल्यामुळे ग्रामस्थांच्या फायद्यासाठी सेंट थॉमस गर्लस हायस्कूलच्या मागे हा प्रकल्प सुचवण्यात आला आहे, असे ते म्हणाले. गाव आणि शाळा व्यवस्थापनाच्या भावना लक्षात घेता, आम्ही आराखड्यात बदल केले असून फुटसाल मैदान आता येथील मैदानाच्या दुसऱ्या बाजूला हलवले जाईल. ज्यामुळे शाळेचा वापर काहीही अडथळा न आणता सुरू राहील, असे आमदार फेरेरा यांनी सांगितले.

शाळेच्या वेळेत गोंधळ, उशिरा रात्री होणारे सामने आणि ध्वनिव्यवस्थेचा वापर याबाबत ग्रामस्थांनी चिंता व्यक्त केली. यावेळी आमदार फेरेरा यांनी स्पष्ट केले की, हे मैदान सर्वांचे असून या मैदानावर शाळेच्या वेळेत कोणतेही कार्यक्रम होणार नाहीत. मैदान रात्री दहा वाजेपर्यंत खेळासाठी खुले राहील आणि ध्वनिक्षेपक व्यवस्था वापरण्यात येणार नाही.