पणजी: राज्यात 15-18 वर्षे वयोगटातील सुमारे 6,000 मुले कोवॅक्सिनचा दुसरा डोस घेण्यास पात्र आहेत. आरोग्य सेवा संचालनालय (DHS) 31 जानेवारीपासून या मुलांसाठी लसीकरण मोहीम राबवणार आहे. (Goa Children Vaccination News Update)

कोरोना लसीचा पहिला डोस घेऊन 28 दिवस पूर्ण झालेली मुलेच या दुसऱ्या डोससाठी पात्र आहेत. गोवा (Goa) राज्य सरकारने 3 जानेवारीपासून 15 ते 18 वर्षे वयोगटातील मुलांचे लसीकरण करण्यास सुरुवात केली होती. राज्यात 15 ते 18 वर्षे वयोगटातील सुमारे 72,000 मुले आहेत.

लसीकरणाच्या (Vaccination) दुसऱ्या डोसबाबत बोलताना राज्य लसीकरण अधिकारी डॉ. राजेंद्र बोरकर म्हणाले की, 3 जानेवारीला लसीचा पहिला डोस घेतलेली सर्व मुले 31 जानेवारीला दुसऱ्या डोस घेण्यास पात्र आहेत. आतापर्यंत राज्यातील 80 टक्के मुलांनी कोरोना लसीचा पहिला डोस घेतला आहे. आतापर्यंत लसीचा पहिला डोस न घेतलेल्या मुलांच्या पालकांना आम्ही आवाहन करतो की त्यांनी त्यांच्या मुलांचे लसीकरण करून घ्यावे, असे बोरकर म्हणाले. लसीकरण मोहीम सर्व सरकारी आणि खाजगी शाळांमध्ये (Schools) राबवली जात आहे.