पणजी : विद्यामंदिर म्हणजे साक्षात देवी सरस्वतीचे स्थान. येथे विद्यार्थी ज्ञानार्जनासाठी येतात. अशा पवित्र ज्ञानमंदिर परिसराचा कुस्तीचा आखाडा झाला, तर त्याला काय म्हणावे. मात्र, असा फ्री स्टाईल हाणामारीचा हंगामा कुजिरातील महाविद्यालय परिसरात पाहायला मिळाला आणि लोकांनी याबद्दल तीव्र नापसंतीही व्यक्त केली.

या धुमश्‍चक्रीचा व्हिडीओ सध्या समाजमाध्यमांवर व्हायरल झाला आहे. याप्रकरणी आगशी पोलिसांशी संपर्क साधला असता, त्याबाबत तक्रार आली नसल्याचे सांगितले. महाविद्यालय व्यवस्थापनाने याची दखल घेतली आहे.

कॅन्टिनमधील वादाचे पर्यवसान

मंगळवारी संध्याकाळी या उच्च माध्यमिक विद्यालयाच्या कॅन्टिनमधील व्हिडीओ समाजमाध्यमांवर व्हायरल झाला. त्यामध्ये दोन विद्यार्थ्यांमध्ये बाचाबाची होऊन हातघाई झाल्याचे दिसून येते. त्यांना त्यांचे मित्र सावरताना दिसतात. यावेळी कॅन्टिनमध्ये इतरही विद्यार्थी होते. कदाचित शालेय आवाराबाहेर हाणामारी होण्यापूर्वीचा हा व्हिडीओ असावा आणि येथूनच वादाला सुरुवात झाली असावी, असे दिसते.

महाविद्यालयीन विद्यार्थ्यांचा गणवेश आणि साध्या पेहरावात असलेल्या मुलांमध्ये हातघाईचा प्रकार सुरू असल्याचे या व्हिडीओमध्ये दिसून येते. एक मिनिट 9 सेकंदाचा हा व्हिडीओ असून, फिल्मी स्टाईलमध्ये ही हाणामारी सुरू असल्याचे दिसते. त्याचवेळी बाजूला छत्री घेऊन उभ्या असलेल्या मुलींपैकी एक मुलगी हा प्रकार मोबाईलवर चित्रित करताना दिसते. तर त्यांच्याविरुद्धची एक मुलगी एकाला चापट लावताना दिसते.