Churchill Alemao: दक्षिण गोव्याचे खासदार फ्रान्सिस सार्दिन हे एक नंबरचे खोटारडे आहेत, मी प्रामाणिक राजकारणी आहे. जर कुणाला शंका असेल तर माझा बँक बॅलन्स तपासा, असा पलटवार चर्चिल आलेमाव यांनी केला आहे. तसेच विजय सरदेसाई आणि आलेक्स रेजिनाल्ड यांना मीच राजकारणात आणले, असेही ते म्हणाले.

चर्चिल आलेमाव यांनी दोन दिवसांपुर्वीच, भाजपची स्तुती केली होती. आगामी लोकसभा निवडणुकीत मी दक्षिण गोव्यात भाजप उमेदवारालाच पाठिंबा देणार, असल्याचे ते म्हणाले होते.

त्यावर दक्षिण गोव्याचे खासदार फ्रान्सिस सार्दिन, आमदार विजय सरदेसाई, आलेक्स रेजिनाल्ड यांनी आलेमाव यांच्यावर टीका केली होती. त्यावर चर्चिल यांनी पुन्हा पलटवार केला आहे.

चर्चिल आलेमाव म्हणाले की, सार्दिन हे एक नंबरचे खोटारडे आहेत. गोव्यात भाजप सरकार स्थापन होण्यास सार्दिनच कारणीभूत आहेत. 1999 मध्ये सार्दिन यांच्या पाठिंब्यामुळेच भाजप सत्तेत आला होता. तर विजय सरदेसाई यांनी 2017 मध्ये मनोहर पर्रीकर यांना मिठी मारली आणि भाजप सरकार सत्तेत आले.

मी आत्तापर्यंत भाजपमध्ये प्रवेश केलेला नाही. भविष्यात काय करेन ते आत्ताच सांगू शकत नाही. पण जेव्हा अल्पसंख्य समुदायातून येत असल्याने डॉ. प्रमोद सावंत यांना विरोध होत होता तेव्हा मी त्यांना पाठिंबा दिला होता. राजकारणात कुणीच मित्र किंवा शत्रु नसतो.

विजय सरदेसाई, आलेक्स रेजिनाल्ड यांना मी राजकारणात आणले. मी वेगवेगळ्या मतदारसंघातून 14 आमदार निवडून आणले. मी प्रामाणिक राजकारणी आहे. जर कुणाला शंका असेल तर माझा बँक बॅलन्स पाहा.

सार्दिन यांनी मार्कलिस्ट घोटाळ्यावर स्पष्टीकरण द्यावे. माझ्यावरील केसेस राजकीय सूडबुद्धीतून केल्या आहेत. मीच उद्घाटन केलेल्या जेलमध्ये मला जावे लागले होते. पण कोर्टाने माझी सुटका केली.

माझा मुलगा सॅव्हिओ आलेमाव बाणावलीतून निवडणूक लढवणार आहे तर मुलगी वालांका आलेमाव ही नावेली मतदारसंघातून निवडणूक लढवेल.