तिसवाडी: सांताक्रुझ येथे एका व्यक्तीवर झालेल्या खुनी हल्लाप्रकरणात जुने गोवे पोलिसांनी चौघांना अटक केली आहे. दोघांना गोव्यातून तर दोघांना सांगली-महाराष्ट्र येथे अटक करण्यात पोलिसांना यश आले. अटक करण्यात आलेल्यांपैकी एक अल्पवयीन आहे, अशी माहिती जुने गोवे पोलिस निरीक्षक सतीश पडवळकर यांनी दिली.

सदर घटना काल दि. ३१ ऑगस्ट रोजी रात्री नऊच्‍या सुमारास घडली होती. तक्रारदार लतीफ तलवय (२५, इंदिरानगर-चिंबल) हा सांताक्रुझ येथील एका बारजवळ उभा होता. तेव्हा संशयित अनिल गुदिन्हो (३०, जुने गोवे), सुनील गुदिन्हो (जुने गोवे) आणि तीन अज्ञात मागून आले. त्‍यांनी फुटलेल्या बाटल्‍यांनी लतीफवर प्राणघातक हल्ला केला. त्यात त्‍याच्‍या पाठीवर आणि पोटावर गंभीर जखमा झाल्या. जुने गोवे पोलिसांनी भारतीय दंड संहितेच्या कलम १८८९ (२), १९१ (२), १९१ (३), १०९ आर/डब्लू १९० अंतर्गत गुन्हा नोंद केला आहे.

तपासासाठी तीन पथके

पोलिसांनी तपासासाठी तीन पथके गठित करून संशयित आरोपींचा शोध घेणे सुरू केले. तेव्‍हा अनिल गुदिन्हो आणि अल्पवयीन हे दोघे मेरशी येथे सापडले. तर इतर दोघांना सांगलीतून ताब्‍यात घेण्‍यात आले. अल्पवयीन संशयिताची रवनागी मेरशीतील ‘अपना घर’मध्‍ये करण्‍यात आली आहे.