पणजी: बोगदा येथे फॉर्म्युला ४ शर्यतीला विरोध झाल्यानंतर नव्या जागेचा शोध आयोजकांनी सुरू ठेवला आहे. बांबोळीचे पठार आणि वेर्णाच्या पठाराची पाहणी यासाठी करण्यात आली होती.

वेर्णा आणि बांबोळीच्या जागेविषयी आयोजक खूश नाहीत. त्यांनी राज्य सरकारला आम्ही नव्या जागेचा शोध घेत आहोत असे कळवले आहे. सूत्रांनी दिलेल्या माहितीनुसार जागेची निश्चिती करणे ही आयोजकांची जबाबदारी आहे.

येत्या ८-१० दिवसांत आयोजक त्याविषयी सरकारला कळवतील. त्यानंतर तेथे सुविधांची उभारणी करण्यासाठी सरकार पावले टाकेल. राज्य सरकारने त्यासाठी ५७ कोटी रुपये खर्च करण्याची तयारी केली आहे. सलग तीन वर्षे ही स्पर्धा राज्यात आयोजित केली जाणार आहे.

गोव्यात होऊ घातलेली आंतरराष्ट्रीय मोटारशर्यत ‘फॉर्म्युला ४’ ही बोगदा परिसरात होणार होती. मात्र स्थानिकांचा विरोध झाल्यामुळे आता वेर्णा आणि बांबोळी परिसरातील जागांची पाहणी आयोजकांनी केली. मात्र ती ठिकाणे त्यांना योग्य वाटली नाहीत. त्यामुळे आता राज्यात अन्य ठिकाणी योग्य जागा मिळू शकते का, याचा शोध आयोजकांकडून सुरू आहे.

राज्य सरकारचे मत आहे की, अशी स्पर्धा गोव्यात झाली तर त्यातून पर्यटन, स्थानिक रोजगार आणि राज्याची ओळख वाढण्यास मदत होईल. मात्र, सुरक्षितता आणि नागरिकांची संमती यांना प्राधान्य देऊनच अंतिम निर्णय घेतला जाईल.

स्पर्धेसाठी लागणारी जागा

या स्पर्धेसाठी सरळ-वळणदार रस्त्यांचा मिळून सुमारे तीन ते चार किलोमीटर लांबीचा मार्ग आवश्यक असतो. केवळ शर्यतीचा रस्ता नव्हे, तर त्यासोबतच वाहनतळ, प्रेक्षक बसण्यासाठी जागा, वाहनांच्या तपासणीची जागा, चालकांसाठी व्यवस्था, तसेच माध्यम आणि वैद्यकीय सुविधा यांसाठीही मोठा मोकळा परिसर लागतो.

आवश्यक सुविधा

वाहनांची तपासणी व दुरुस्ती करण्यासाठी विशेष जागा

अपघात झाल्यास त्वरित उपचारासाठी वैद्यकीय केंद्र

शर्यतीच्या सुरक्षिततेसाठी मजबूत लोखंडी कुंपण व बॅरिअर

प्रेक्षकांसाठी आसनव्यवस्था, अन्न-पाणी, प्रसाधनगृहे

वाहतूक नियंत्रणासाठी पोलिस व प्रशासनाची मदत

रस्ते बंद केल्यामुळे निर्माण होणारी गर्दी टाळण्यासाठी नियोजन