पणजी: गोव्याच्या राजकारणात एक महत्त्वाचा बदल घडला असून आंध्र प्रदेशातील ज्येष्ठ नेते आणि माजी केंद्रीय मंत्री पुसपती अशोक गजपती राजू यांनी शनिवार (दि.२६ जुलै) राजभवनात गोव्याचे नवे राज्यपाल म्हणून शपथ घेतली. राष्ट्रपती द्रौपदी मुर्मू यांनी १४ जुल २०२५ रोजी केलेल्या देशभरातील राज्यपाल पदांच्या मोठ्या फेरबदलाचा एक भाग म्हणून त्यांची ही नियुक्ती करण्यात आली होती.

श्रीधरन पिल्लई यांच्या जागी राजू

गोव्याचे माजी राज्यपाल श्रीधरन पिल्लई यांच्याकडून अशोक गजपती राजू यांनी आता गोव्याच्या राज्यपालपदाची सूत्रे हाती घेतली आहेत. गोव्यासारख्या महत्त्वाच्या राज्याची जबाबदारी त्यांच्या अनुभवी खांद्यांवर आली आहे.

कोण आहेत पी. अशोक गजपती राजू?

पुसपती अशोक गजपती राजू हे आंध्र प्रदेशातील राजकारणात एक सुप्रसिद्ध व्यक्तिमत्त्व आहे. विजयनगरमच्या ऐतिहासिक शाही पुसपती घराण्याशी त्यांचा संबंध आहे. त्यांची राजकीय कारकीर्द अत्यंत प्रदीर्घ आणि विविधरंगी राहिली आहे.

नरेंद्र मोदी यांच्या नेतृत्वाखालील केंद्र सरकारमध्ये त्यांनी केंद्रीय नागरी विमान वाहतूक मंत्री म्हणून महत्त्वपूर्ण भूमिका बजावली. या काळात त्यांनी देशाच्या विमान वाहतूक क्षेत्रात अनेक महत्त्वाचे निर्णय घेतले आणि धोरणे राबवली.

केंद्रातील अनुभवाव्यतिरिक्त, अशोक गजपती राजू यांनी आंध्र प्रदेशच्या राज्याच्या राजकारणातही मोलाचे योगदान दिले आहे. त्यांनी आंध्र प्रदेश सरकारमध्ये अर्थ, नियोजन आणि महसूल यांसारखी अनेक महत्त्वाची खाती सांभाळली आहेत. या अनुभवामुळे त्यांना राज्याच्या आर्थिक आणि प्रशासकीय पैलूंवर चांगली पकड आहे. त्यांची दीर्घ संसदीय कारकीर्द त्यांना राज्याच्या विकासासाठी आवश्यक असलेल्या धोरणात्मक निर्णय घेण्यास मदत करेल, अशी आशा व्यक्त केली जात आहे.