मडगाव: आर्थिक व्यवहारातून माजी पर्यटनमंत्री मिकी पाशेको यांना १३ लाखांचा गंडा घातल्याच्या आरोपाखाली कोलवा पोलिसांनी फिडोल परेरा हिला अटक केली आहे. तर तिचा अन्य एक सहकारी क्लाव कार्दोज याचा सध्या शोध सुरू असल्याचे पोलिसांनी सांगितले.

दरम्यान, पाशेको यांनी शनिवारी मडगावात पत्रकार परिषद घेऊन, सध्या फिडोल  व  तिचे अन्य काही सहकारी आपल्या विरोधात अकारण गरळ ओकत असल्याचा आरोप केला. फिडोल  व यूटूबर्स  चॅनेल अलर्ट  गोवन्स हे आपली नाहक बदनामी करत असून आपण याबाबत कोलवा पोलिस ठाण्यात तक्रार नोंद केल्याचे सांगितले. 

मी तिच्याकडून  रक्कम घेतली होती. माझी सर्व बँक खाती २०१० साली गोठविण्यात आली होती. जी रक्कम मी घेतली ती परत केली, असे पाशेको म्हणाले. फसवणुकीची ही घटना  यावर्षी जून व जुलैदरम्यान  घटना घडली  होती.

कोलवा पोलिसांनी हे प्रकरण नोंदवून घेतले होते. कोलवा पोलिस ठाण्याचे पोलिस निरीक्षक विक्रम नाईक यांनी दिलेल्या माहितीनुसार, सध्या फिडोल अटकेत असून, पुढील तपास सुरू आहे.

फिडोलची प्रकृती बिघडली!

फिडोलची प्रकृती बिघडल्याने तिला इस्पितळात दाखल केले आहे. तिला तेथून डिस्चार्ज मिळाल्यानंतर रिमांडसाठी न्यायालयात हजर केले जाईल, अशी माहिती कोलवा पोलिसांनी दिली.