पणजी: गोव्यासाठी पर्यटन अत्यंत महत्वाचं आहे, आणि पर्यटनामधून येणाऱ्या महसुलात घट झाल्यास गोव्यासाठी धोक्याची घंटा निर्माण झाली असं म्हणावं लागेल. गोव्यात वर्षभरात देशी आणि विदेशी पर्यटक भेट देत असतात आणि आनंदाची बाब म्हणजे यंदाच्या वर्षी गोव्यात येणाऱ्या देशी प्रमाणेच विदेशी पर्यटकांमध्ये वाढ झाली आहे. गोव्याचे खासदार सदानंद शेट तानावडे यांनी विचारलेल्या प्रश्नाचे केंद्रीय नागरी विमान वाहतूक मंत्रालय राज्यमंत्री मुरलीधर मोहोळ यांनी दिलेल्या उत्तरावरून ही माहिती समोर आली.

कोरोनानंतर वर्ष २०२२ पर्यंत राज्यात पर्यटकांच्या संख्येत घट झाली होती, मात्र २०२३ पासून गोव्यातील पर्यटनाची स्थिती बदलायला सुरुवात झाली आहे . वर्ष २०२२-२३ मध्ये एकूण ४,६७,४१० विदेशी पर्यटकांनी गोव्याला भेट दिली.

हाच आकडा वर्ष २०२३-२४ मध्ये ५,४२,३७७ वर जाऊन पोहोचला. दाबोळी विमानतळावरून ४,२७,०८९, तर मोपा येथील मनोहर आंतरराष्ट्रीय विमानतळावरून १,१५,२८८ पर्यटकांनी गोव्यातला भेट दिली होती अशी माहिती मंत्री मुरलीधर मोहोळ यांनी दिली.

कोरोना महामारीमुळे गोव्यातील पर्यटनाला जबरदस्त फटका बसला होता आणि यामुळे गोव्यातील पर्यटनावर आधारित व्यवहारांना नुकसान सोसावे लागले मात्र त्यानंतर हळूहळू परिस्थती सुधारायला सुरुवात झाली आहे. पर्यटकांचा आकडा पहिला तर विदेशी पर्यटकांना गोव्याची ओढ पाहायला मिळते.