डिचोली : सुर्ल येथील फेरीधक्क्याजवळ बुधवारी (ता.१९) सकाळी नदीत तरंगताना एका ज्येष्ठ नागरिकाचा मृतदेह आढळून आला. मृत व्यक्ती तिशान-कोठंबी येथील असून उल्हास विनायक नाईक (६१) असे त्यांचे नाव आहे.

मयताच्या नाकाला जखम झाल्याचे आढळून आले असून, तोल जाऊन ते नदीत पडले असावेत, असा प्राथमिक अंदाज आहे. याप्रकरणी पोलिस तपास करीत आहेत. याबाब माहिती मिळताच, डिचोली अग्निशमन दलाच्या जवानांनी घटनास्थळी धाव घेतली व मृतदेह नदीबाहेर काढून डिचोली पोलिसांकडे सुपुर्द केला.

अग्निशमन दलाचे लिडींग फायर फायटर महेश डी. नाईक यांच्या मार्गदर्शनाखाली अमोल नाईक (चालक ऑपरेटर), आशीष मोर्लेकर, योगेश माईणकर, संजय उसपकर, अनुप नाईक आदी जवानांनी ही कामगिरी केली.

पोलिसांनी पंचनामा करून मृतदेह उत्तरीय तपासणीसाठी गोमेकॉत पाठविला आहे. वरिष्ठांच्या मार्गदर्शनाखाली साहाय्यक पोलिस उपनिरीक्षक कृष्णाजी गावस पुढील तपास करीत आहेत.

उल्हास नाईक यांचा मृत्यू अपघातानं झाला की अन्य काही कारण आहे, याबाबत डिचोली पोलिस अधिक तपास करत आहेत. या घटनेमुळे परिसरात भीतीचं वातावरण पसरलं आहे.