पणजी: पर्वरी येथे सांडपाणी निचरा संयंत्रासाठी (एसटीपी) जागा शोधण्यास होत असलेल्या विलंबाची दखल मुंबई उच्च न्यायालयाच्या गोवा खंडपीठाने घेतल्यानंतर सरकारी यंत्रणा गतिमान झाली. सुकूर येथे या प्रकल्पासाठी जागा उपलब्ध केल्याची माहिती आज सांडपाणी साधनसुविधा विकास महामंडळ लि.ने (एसआयडीसीएल) स्थिती अहवाल सादर करून दिली. या प्रकल्पाचे महत्त्व लक्षात घेऊन तातडीने पावले उचलण्याचे निर्देश खंडपीठाने दिले.

पर्वरी येथील सांडपाणी निचरा संयंत्रासाठी जागा मिळण्यात अडचणी येत असल्याचे कारण देऊन हा प्रकल्प कित्येक वर्षांपासून पडून रखडला होता. तो गतिमान करण्याचे निर्देश देण्याची विनंती याचिकादार रोहन अशोक खंवटे यांनी दाखल केली होती. मागील सुनावणीवेळी गोवा खंडपीठाने 23 फेब्रुवारी रोजी दिलेल्या आदेशात या संयंत्रासाठी जागा शोधण्यासंदर्भातील निर्णय पुढील सुनावणीवेळी कळवण्याचे निर्देश सरकारला दिले होते. त्यानुसार आज सरकारतर्फे स्थिती अहवाल सादर करण्यात आला.

सुकूर येथील सर्वे क्रमांक 69 च्या उपविभागाच्या भाग 1,2 व 4 मध्ये जागा शोधण्यात आली आहे. भूसंपादन कायद्याखाली असलेल्या सरकारच्या धोरणानुसार ही जमीन ताब्यात घेण्यात येणार आहे. सरकारने या जागेसाठी मंजुरी दिली आहे, असे अहवालात एसआयडीसीएलच्या व्यवस्थापकीय संचालकांनी नमूद केले आहे.

आतापर्यंत 124.53 कोटी खर्च

या सांडपाणी प्रक्रिया संयंत्राच्या कामासाठी येणाऱ्या अडचणी खंडपीठासमोर मांडण्याऐवजी त्यावर तोडगा काढून त्याची अंमलबजावणी करण्यासाठी प्रयत्न करावा. सांडपाणी निचरा प्रकल्प राबवण्यासाठी आतापर्यंत सुमारे 124.53 कोटी रुपये खर्च झाले आहेत. त्यामुळे यापुढे आणखी कोणतीही कारणे नकोत. कारण हा प्रकल्प जनहिताचा आहे. या प्रकल्पाच्या कामाचा पुढील स्थिती अहवाल जाणून घेण्यासाठी ही सुनावणी 11 एप्रिलपर्यंत तहकूब केल्याचे खंडपीठाने निर्देशात म्हटले आहे.