मडगाव: शेल्डे येथील वीज उपकेंद्रातील तीन ट्रान्सफॉर्मर एकाचवेळी ट्रिप झाल्याने कुशावतीसह दक्षिण गोव्यातील अनेक भागांचा वीजपुरवठा बुधवारी सकाळी ७.३० वाजता खंडित झाला.

यामुळे जनजीवन आणि व्यावसायिक व्यवहारांवर परिणाम झाला. वीज खात्याच्या अधिकाऱ्यांनी पाच तासांच्या प्रयत्नांनंतर दुपारी १ वाजता वीजपुरवठा पूर्ववत केला. मात्र, बिघाडाचे नेमके कारण स्पष्ट झाले नव्हते.

बिघाड कशामुळे?

वीज खात्याचे अधीक्षक अभियंते राजीव सामंत यांनी दिलेल्या माहितीनुसार, शेल्डे येथे कावळा वीजवाहिनीवर बसल्याने दोन वाहिन्या एकमेकांच्या संपर्कात आल्या असाव्यात. तसेच वेर्णा येथील वीजवाहिनीच्या केबल्स कापल्यानेही बिघाड झाला असावा. मात्र, कारण स्पष्ट झालेले नसून चौकशी सुरू आहे.