सासष्टी: ६१ दिवसांची मासेमारी बंदी ३१ जुलै रोजी संपत असून नवा हंगाम १ ऑगस्टपासून सुरू होणार आहे. या नव्या मासेमारी हंगामाच्या स्वागतासाठी सासष्टी किनारपट्टीतील मच्छीमार तयारीला लागले आहेत. सध्या सतत पडत असलेल्या पावसामुळे समुद्र खवळलेला आहे व ही स्थिती मासेमारीसाठी योग्य नसल्याने मच्छीमार थोडे चिंतीत झालेले असले, तरीही त्यांनी तयारी सुरू केली आहे.

कोलवा, बाणावली येथील मच्छीमार आपल्या जाळ्याची तपासणी व जुळवाजुळव करू लागले आहेत. परप्रांतीय मजूरसुद्धा हळूहळू आपल्या गावांतून परतू लागले आहेत. कुटबण व बेतुल जेटीवरही मच्छीमारांची लगबग सुरू झाली आहे. परप्रांतीय मजूरही बोटींच्या सज्जतेसाठी जेटीवर दिसू लागले आहेत. देशाच्या विविध भागांतून अनेक मच्छीमार मजूर गोव्याकडे येण्यास निघाले आहेत.

बोटींची तपासणी सुरू

यासंदर्भात कोलवा येथील मच्छीमार दुमिंग रॉड्रिग्ज म्हणाले, की आम्ही आमच्या परीने तयारीला लागलो आहोत. आम्ही आमच्या बोटीची तपासणी सुरू केली आहे. एक दोन दिवसांत चाचणीसुद्धा करण्यात येईल.

‘उद्या घेणार आशीर्वाद’

बाणावली येथील मच्छीमार पेले फर्नांडिस म्हणाले, की आम्ही सर्व मच्छीमार देवाचे आशीर्वाद घेण्यासाठी २५ जुलै रोजी बाणावली येथील क्रॉसजवळ जमणार आहोत. त्यानंतर पावसाच्या स्थितीचा अंदाज घेऊन मासेमारीसाठी समुद्रात जाण्याविषयी ठरविण्यात येणार आहे.