सासष्टी: गोव्यात १०५ किमी समुद्र किनारा आहे व या किनाऱ्यावर कित्येक मच्छिमार पिढ्यान् पिढ्या मासळीचा व्यवसाय करून आपली उपजीविका चालवत आहेत. मात्र, काही लोक आता विकासाच्या नावाखाली समुद्र किनाऱ्याची वाट लावत असून त्याचा फटका पारंपरिक मच्छिमारांना बसत आहे.

याची जाणीव आपल्याला आहे. आपण पारंपरिक मच्छिमारांचे प्रश्न संसदेत मांडणार आहे, असे आश्र्वासन दक्षिण गोव्याचे खासदार कॅ. विरियातो फर्नांडिस यांनी आज वेळ्ळी, चिंचोणे, असोळणा येथील मच्छिमारांची भेट घेतली तेव्हा सांगितले.

या मच्छिमारांनी आपल्या अनेक समस्या खासदारांसमोर मांडल्या. मच्छिमारांनी त्यांचे प्रश्न मांडण्यासाठी मागे राहू नये. जर आपल्याला या विषयावर संसदेत बोलण्याची संधी मिळाली नाही तर आपण संबंधित खात्याच्या मंत्रालयाला पत्र लिहून मच्छिमारांचे प्रश्न सोडविण्यासाठी प्रयत्न करणार आहे, असेही त्यांनी सांगितले.

पाटकरांच्या पत्राबद्दल माहीत नाही, विरियातो

गोव्याचे कॉंग्रेस प्रदेशाध्यक्ष अमित पाटकर यांनी हळदोण्याचे आमदार कार्लुस फेरेरा यांच्या विरोधात पत्र लिहिले आहे, याची आपल्याला काहीही माहिती नाही, असे कॉंग्रेसचे दक्षिण गोव्याचे खासदार कॅप्टन विरियातो फर्नांडिस यांनी आज पत्रकारांना सांगितले.

आपण केवळ पत्र पाठविल्याचे वर्तमान पत्रातून वाचले आहे. या संदर्भात आपण कुणाशीही संपर्क साधलेला नाही. हा पक्षाचा अंतर्गत प्रश्न आहे व तो मिटवला जाईल, असेही फर्नांडिस यांनी स्पष्ट केले. सोमवारपासून सुरू होणाऱ्या पावसाळी अधिवेशनात त्याचा काहीही परिणाम होणार नसल्याचेही त्यांनी स्पष्ट केले.