फातोर्डा: सासष्टी तालुक्यातील समुद्र किनारी मच्छीमारांना मोठ्या प्रमाणात सोलर कोळंबी सापडली आहे. सासष्टी येथील लहान बोटीवाल्यांनी आपल्या मच्छीमारांच्या हंगामाला तीन दिवसापूर्वी सुरुवात केली आहे. गेले दोन महिने मासेमारी बंद आहे. मासेमारी बंद असली तरी मात्र साष्टीत पारंपारिक पद्धतीने गेले तीन दिवस ती सुरु केली आहे. त्याचा फायदा मच्छीमारांना झाला आहे.

राज्यातील मासेमारी 1 ऑगस्टला सुरु होणार

राज्यातील मासेमारी बंदी ऑगस्ट महिन्याच्या पहिल्या दिवशी उठणार आहे. असे असले तरी लहान मच्छीमारांनी दर्या शांत असल्याने तीन दिवसांपूर्वी आपल्या बोटी घेऊन समुद्रात उतरायला सुरुवात केली आहे. मागील दोन दिवसांपासून येथील मच्छीमाऱ्यांना मोठ्या प्रमाणात कोळंबी मासळी सापडली आहे. त्यामुळे मच्छीमार खुश झाले आहेत.

या बंपर धमाक्यात कासावली, कोलवा, बाणावली, वार्का येथील व्यवसायिकांचा समावेश आहे. या विषयावर बोलताना कासावली येथील मासळी मारी करणारे जॅकी फेर्नांडीस यांनी सांगितले की, येथील मच्छीमारांनी आपल्या बोटी समुद्रात उतरविल्या आहेत.यापैकीच काहींना मोठ्या प्रमाणात कोळंबी सापडली आहेत. बाणावली सहित येथील काही मच्छीमारांना अशाच प्रमाणे कोळंबी प्रकारची मासळी सापडली आहे. त्यांना दर ही चांगला मिळाल्यास आपल्याला अजून आनंद होईल असे ते म्हणाले.